Awe Tweede Kamer, o sea Parlamentu ulandes a kuminsá ku e deliberashonnan tokante leinan di BES. Representantenan di pueblo ulandes ta papia riba e promé seis di mas o ménos 30 lei formulá pa inkorporá Boneiru, Saba i Statia den e sistema gubernamental di Hulanda, pero tin hopi krítika riba e proposishonnan di lei.
 

Eksperto riba tereno di derecho polítiko, Douwe Jan Elzinga ta bisa ku ta trata di un momentu masha importante den e proseso pa e statùs nobo pa e tres islanan. Prinsipalmente partidonan di oposishon den parlamentu ulandes tin hopi krítika riba e manera ku a realisá e leinan. "E pregunta mas importante ta si e konstrukshon skohí ta sustenibel", asina Elzinga ta bisa.
 
Na e islanan mes tambe ta duda di esaki, segun e eksperto. "Ei ta trata e aspekto di trato igual'. E islanan di BES no ta bira munisipionan nòrmal di Hulanda i e sirkunstanshanan ekonómiko ta buta ku bo no por tuma leinan ulandes sin mas, asina e ta rekonosé. Pero Elzinga ta komprondé ku tin hopi pregunta ahinda.
 
Konstitushon
Pa sierto problema a inkorporá garantía den e leinan di BES. Asina e habitantenan di e islanan por vota pa Eerste Kamer, esta senadó ulandes. Tambe nan tin derechi pa nan mes solushoná sierto problema. Pa munisipionan ulandes e tipo di kosnan aki ta ankrá den Konstitushon. "Akiratu ora ku un gabinete nobo sinta, por bolbe adaptá e legislashon. E garantianan konstitushonal ei no ta konta pa e islanan BES. Esei mi ta haña un problema grandi."
 
Elzinga ta haña ku ta p'esei mester adaptá Konstitushon, pero a bisa ku esei no tin mester. "Pero ta mihó tuma medida for di awor i no despues ora ta lat. Ta p'esei mi ta haña ku tòg mester adaptá konstitushon. E kos akí ta un riesgo grandi pasobra di e manera akí hinter e operashon di BES por frakasá." Elzinga ta kere ku un parti di Tweede Kamer lo insistí pa kambia Konstitushon. Sekretario di estado (Bijleveld di Relashonnan di Reino, red) ta tuma un riesgo grandi.
 
10-10-10
Eerste Kamer, esta senado ulandes mayoria be ta paga bon tinu riba defisiensia di proposishonnan di lei. Senado por opstakulisá un lei. Elzinga ta haña tambe ku tratamentu di e leinan den parlamentu ulandes na e momentunan akí ta un tiki prematuro. Ku ta trata e leinan akí awóraki ta pasó e fecha di 10 di òktober 2010 ta riba mesa. 'Ami ta kere ku e fecha akí ta totalmente irealisabel. Asina tantu kos mester sosodé ahinda, i e referèndùm na Boneiru i elekshon di Staten tambe por tin konsekuensha."