Ayera atardi Tweede Kamer, o sea parlamento ulandes a bai di akuerdo ku e promé shete leinan di BES. Ku e votashon na favor di e leinan akí, a dal un paso mas den direkshon di un statùs nobo pa e islanan karibense. Pero perspektiva pa Boneiru ta unu di suspenso, ya ku ainda por tene un referèndem na e isla.  

Partidonan CDA i SGP a ophetá e kambionan legislativo ku mester fasilitá inkorporashon di matrimonio homoseksual, aborto i eutanasia den lei pa e entidatnan públiko Boneiru, Sint Eustatius i Saba. Pa e motibu akí partido di koalishon ChristenUnie a vota kontra e lei di Adaptashon, mió konosí komo Aanpassingswet BES.
Mester bisa sí ku un mayoria den parlamento ulandes ta respaldá un moshon di partido ChristenUnie, ku ta enserá ku Hulanda mester tene kuenta ku un eventual referèndem na Boneiru.

Parlamentario Ortega-Martijn di ChristenUnie den kòmbersashon ku Scarlet Windster

E mes atardi sekretario di estado Ank Bijleveld di Relashonnan den Reino tabatin un enkuentro ku un delegashon di Boneiru. E mandatario demishonario a palabrá ku diputado Marugia Janga di Struktura Estatal ku Boneiru lo regresá rápidamente na mesa di negosiashon, pa papia ku komisario di Reino Henk Kamp riba partishon di tarea.

Mediados di aprel lo por firma un akuerdo di gobernashon entre Hulanda i Boneiru. Fin dje luna akí Jopie Abraham ta remplasá Marugia Janga komo diputado di Struktura Estatal, pero pa motibunan no muchu kla e no tabata presente n'e kòmbersashon ku sekretario di estado Ank Bijleveld di Relashonnan di Reino.

Vários senario
Den parlamento Bijleveld a primintí 'fasilidatnan' si por si akaso referèndem na Boneiru resultá negativo pa e palabrashonnan hasí. "Bo mester tin algun senario kla pa por si akaso." E no a divulgá nada di kontenido di e senarionanan akí; el a bisa solamente ku ku e lo studia nan bon atrobe. E mandatario demishonario ta spera sí ku e manera di puntra ta di tal manera, ku no ta pone tur kos na peliger i ku Konseho Insular di Boneiru ta realisá ku e kaminda ku ta kana ta na interes di pueblo.

Boneiru lo risibí 'espasio máksimo' den margen di e palabrashonnan hasí enkuanto e statùs nobo, asina Bijleveld a primintí. El a enfatisá ku despues e isla por opta di pursí p'un otro statùs, manera esun di pais den seno di Reino. "N'e momento akí ta sea entidat públiko òf independiente. No tin un struktura intermedio manera por ehèmpel un asosiashon liber. Bo'n por sa nunka den futuro, pero e or'ei Boneiru mester mustra kiko e por.