Tweede Kamer, o sea parlamento ulandes a bai di akuerdo ku e promé shete leinan di BES. Esaki no a bai asina asina. Partidonan CDA i ChristenUnie a ophetá e kambionan legislativo ku mester fasilitá introdukshon di matrimonio homoseksual, eutanasia i aborto den lei pa e entidatnan públiko Boneiru, Sint Eustatius i Saba.

 
Ank Bijleveld, sekretario di estado demishonario pa Relashonnan di Reino a keda sumamente kontentu despues di votashon den parlamento. 'Esakinan ta e promé leinan ku a aseptá den un situashon demishonario." Asina ta ku un 'Pabien' sigur sigur ta na su lugá.", segun e sekretario di estado.
 
Bijleveld ta konsiente sí di e echo ku ta algo sumamente delikado na Islanan BES, kédesir e modifikashonnan di lei ku mester posibilitá aborto, eutanasia i matrimonio pa homo. Partidonan di koalishon CDA i ChristenUnie a vota kontra e modifikashonnan di lei, ya ku nan no ta tene kuenta ku kultura i karákter dje islanan karibense. 
 
E sekretario di estado en todo kaso lo respetá deseo di e mayoria parlamentario, pero tambe lo e  mira kon ta hasi implementá e leinan, ku hopi koutela i semper den diálogo ku e islanan. "Lo mi tene kuenta debidamente ku e sintimentunan ku ta biba bou di pueblo".
 
Aseptashon di legislashon pa BES ta, segun Bijleveld, un promé paso den un trayekto masha grandi. E echo ku parlamento a skohe pa trata leinan pa BES di pursí ta pone ku por dal bai ku e proseso di struktura estatal.

Skucha Ank Bijleveld den kòmbersashon ku Scarlet Windster