E finansamentu no ta kompletu ainda pero produkshon di ‘Tula, the Revolt, e sine internashonal tokante e rebelion di katibu grandi na Kòrsou, ta sigui. Pa haña sobrá di e plaka nesesario e kas di produkshon ta saka akshon pa partikular ku ke sostené e proyekto.

Tumadónan di inisiativa Dolph van Stapele i Jeroen Leinders a disidí di kue e plaka ku nan tin kaba i kuminsá numa ku produkshon di e sine. “Kuantu bùdjèt tin nos no ta papia di dje aktualmente. Esaki ke men sí ku nos ke sigui un otro enfoke den realisashon di ‘Tula, the Revolt’. Asina ku ménos plaka tòg nos por garantisá kalidat di e produkto final”, Dolph van Stapele ta konta.

No nesesario
Leinders ta bisa ku ainda por kumpra akshon pa e sine. Un akshon ta kosta 310,10 dòler. “Ku e plaka adishonal aki nos por hasi e diferensha ku por ehèmpel un shòt di helikòpter of un simulashon digital di Punda na aña 1795”, e ta konta. “Esakinan ta kos ku no ta pas den e bùdjèt aktual, pero ku lo enrikesé e eksperiensha di e sine. No ta estriktamente nesesario pa e historia sí.”

Deadline importante
Leinders i Van Stapele tin tres aña kaba ta desaroyá ‘Tula, the Revolt’. Pa e hasi e skrept histórikamente korekto a hasi uso di ekspertisa di Pacheco Domacassé i Charles do Rego. Na añanan ’70 di siglo pasá Domacassé a traha e promé obra teatral tokante Tula i Do Rego ta ko-outor di e buki ‘Slavery and Resistance in Curaçao’.

E produktornan ta di opinion ku e historia di Tula sigur no por keda sin ta presente durante selebrashon di 150 aña abolishon di sklabitut, otro aña. “Ta p’esei nos mester kuminsá ku produkshon awor. Asina e sine por estrená den e tempu ei”, Van Stapele ta bisa.

Elenko internashonal
E elenko di e sine lo bai konsistí di un meskla di aktor britániko, kurasoleño i hulandes. Na Kòrsou lo kuminsá ku oudishon for di medio yüli.

Por haña mas informashon via: www.tulathemovie.nl