Tur habitante di Antia i tambe Rubianonan mester haña derecho pa vota pa parlamentu hulandes, esta Tweede Kamer. Nan mester haña derecho tambe pa postulá nan mes komo kandidato parlamentario pa Tweede Kamer. E derecho di voto akí mester konta pa Aruba, Kòrsou i Sint Maarten ku den futuro ta paisnan independiente den Reino.
 
E kos akí tin para den un konseho di tres eksperto presentá dia 11 di novèmber na Den Haag. E ekspertonan a presentá e rapòrt 'Kiezen voor het Koninkrijk', esta 'Skohe pa Reino'. E ekspertonan ta forma parti dje komishon instituí pa e Deliberashon Parlamentario di Relashonnan den Reino (POK). E komishon mester a analisá e défisit demokrátiko den Reino, pa haña sa kiko ta e puntonan mas swak dje demokrasia.
 
Derecho di voto
Habitantenan di Antia i Aruba ta siudadano hulandes, pero nan no tin mag di emití nan voto pa elekshon parlamentario. For di no mashá tempu pasá habitantenan di Antia i Aruba por partisipá na elekshon pa parlamentu oropeo. E islanan Boneiru, Saba i Statia sí ta haña derecho di voto pa Tweede Kamer ora nan bira munisipionan ekstraordinario di Hulanda entrante 10 di òktober 2010. Kòrsou i Sint Maarten lo sigui komo paisnan independiente den Reino. Pero habitantenan dje delaster dos isla, meskos ku esnan di Aruba no por bai urna pa elekshon parlamentario na Hulanda. E komishon ta rekomendá awor pa hasi esaki posibel.
 
Niun kambio drástiko
Mavis Brooks-Salmon, presidente dje komishon Défisit Demokrátiko a bisa durante presentashon dje rekomendashonnan ku mester yega na un sistema pa hulandesnan karibense den Reino haña mas influensha riba desishonnan riba nivel di Reino. "E islanan tin tiki kontrol riba lokual ministernan riba nivel di Reino ta hasi. Nos a wak kon pa legitimá mas tantu demokrasia sin ku lo trese kambio drástiko fundamental den Statüt òf konstitushon di Hulanda."
 
Cornelio James èks-representante di Aruba na Bruselas a enfatisá riba e punto importante di relashonnan eksterior. Mester tene na bista tambe desishonnan ku tuma den Union Oropeo ku tambe lo tin konsekeunsha pa Antia i Aruba, segun James. "Tin preparashonnan di lei i desishonnan den Union Oropeo ku ta toka Antia i Aruba. Parlamentunan nashonal dje paisnan miembro den Union Oropeo ta trata e desishonnan akí, pero no tin partisipashon dje parlamentunan di Antia i Aruba. E islanan karibense tambe mester por kontrolá."
 
Skucha un entrevista ku Hubert Maduro miembro di Konseho di Estado na Hulanda, Cornelio James, èks-representante di Aruba na Bruselas i tambe Mavis Brooks-Salomon, presidente dje komishon Défisit Demokrátiko.

Esaki tabata un reportahe di Romeo Hoost.