Despues di un reunion sumamente kaótiko, e Komishon fiho di Parlamentu hulandes pa Asuntunan antiano i arubano a disidí ayera pa no deklará e leinan p'e entidatnan públiko Boneiru, Sint Eustatius i Saba kontrovershal. Mayan Parlamentu hulandes ta finalisá tratamentu di e leinan aki den un debate plenario.

Tratamentu di e leinan di Konsenso, o sea leinan di Reino no ta sigur ainda. Den Tweede Kamer un mayoria ke sigui ku tratamentu di e leinan aki, pero komo ku un minoria substanshal ke deklará tratamentu di e leinan akí kontrovershal, otro siman djaweps e desishon final ta kai.

E echo ku a disidí ku lo sigui trata leinan pa Islanan BES no a soprendé Cynthia Ortega-Martijn. E parlamentario antiano, miembro di Tweede Kamer pa partido ChristenUnie ta splika ku e tabata sa kaba kua partido lo a deklará e tratamentu dje leinan komo kontrovershal.

For di 2004 ta trahando riba e proseso pa desmantelá Antia. Pa keda sin trata e leinan akí ètòl por pone ku kualke gobièrnu ku sinta na Hulanda por hasi i deshasí, loke ta algu ku ChristenUnie no ke riska. Ademas, nunka no a bisa ku tur lei mester pasa pa duna BES e statùs komo munisipio ekstraordinario ulandes, segun parlamentario Cynthia Ortega-Martijn.