E apoyo den parlamento ulandes pa e proseso di desmantelashon di Antia ulandes ta bahando mas i mas.  Ayera e kos akí a sali na kla durante un reunion di prosedimento di Komishon Fiho Parlamentario pa Asuntunan Antiano i Arubano, ku a tuma lugá den un ambiente hostil.

T'asina ku den un reunion di prosedimento ta fiha agènda pa próksimo temporada. Tratamentu di e diferente leinan di konsenso, ku mester posibilitá renobashon estatal di Antia, i tambe legislashon pa Islanan BES ta tópikonan importante ku mester keda garantisá. Loke ta opvio ta en todo kaso ku e deliberashon riba e leinan nobo ta kanando atras.

Si ta dependé di VVD, SP i PVV, parlamento ulandes lo studia e asuntu di legislashon pa BES te despues di e referèndem na Boneiru. E kos akí por kondusí na un retraso grandi di e proseso di disolushon di Antia ulandes. E partidonan di koalishon CDA i PvdA no ke tende dje kos akí. GroenLinks tambe ke pasa rápidamente pa tratamentu di legislashon nobo pa Boneiru, Saba i Statia.

Lei pa BES
Promé ku parlamento ulandes kuminsá trata lei pa BES, e ke informashon adishonal di sekretario di estado Bijleveld enkuanto e proyekto di lei estatal pa kambio di Statüt i e referèndem na Boneiru. Ultimo dianan a surgi hopi konmoshon ku e proposishon di lei akí, ya ku e kolegio insular nobo di Boneiru a entregá un petishon pa want'é promé ku trat'é.

E reunion di prosedimento a desaroyá na un manera skèrpi. E pregunta ki tempu mester deliberá riba lei nobo no ta e úniko kos ku a trese hopi diskushon, pero tambe e proposishon di Willibrord van Beek, presidente di e Komishon Fiho. El a proponé pa reservá 'krokusreces' (fakansi di prinsipio di  aña, djis promé ku primavera na Hulanda-red) pa un eventual deliberashon parlamentario di Relashonnan den Reino (POK) na Kòrsou, loke a lanta un tremendo disputa entre Van Beek i Hero Brinkman di PVV.

Van Beek a indiká, ku enbista di e próksimo elekshon antiano no ta faktibel pa biaha pa Antia na yanüari pa e deliberashon parlamentario di kada mei aña. Brinkman a bula reakshoná iritá ku e pregunta, si POK un'muri fo'i masha ten te ku a der'é. Ineke van Gent di GroenLinks a kunsumí mashá ku desaroyo di e reunion. “Ta komosifuera ta den shap nos ta”, van Gent a suspirá, pa despues Hero Brinkman di PVV dal un harí i pidi un serbes, refiriendo na e 'insidente di beter' siman pasá na Nieuwspoort, kaminda e tabata sentro di atenshon.

Retraso
E deliberashon den parlamento ulandes a demostrá en todo kaso ku e sosten pa proseso di reforma di Antia ulandes ta bahando bárbaramente. Segun e miembro di GroenLinks, tur hende mester kuminsá usa su sano huisio. “Nos a pasa e fase ku nos por bini bèk riba palabrashon hasí ”, segun Van Gent, ku ta prekupá mashá ku progreso di e proseso di renobashon estatal. “Nos tin ku sigui kana e kaminda ku nos a kue òf lébumai tur kos. Pasó si nos sigui pulushá asina'kí, e or'ei aki dies aña ainda nos no a keda kla."
 

Bas Jan van Bochove, miembro parlamentario pa CDA, ta prekupá ku e sosten menguante pa reformashon estatal di Antia. “Na 2006 Tweede Kamer tabata unánimamente di akuerdo ku e palabrashonnan hasí. Pero apoyo di e proseso ta deteriorando mas i mas. Van Bochove no tin masha komprenshon pa rumbo di e kolegio insular nobo di Boneiru. E parlamentario ta haña ademas ku e relashonnan polítiko na Hulanda ta birando mas i mas vago. E ta teme pues ku Antia ulandes ta kibuká ku e klima polítiko na Hulanda, ku ta kambiando. “Tanten tin un mayoria pa kaba ku e proseso akí segun e palabrashonnan hasí mi ta bisa pues: 'count your blessings', pasó kos por bin kambia de pronto na Hulanda tambe."

Skucha un reportahe di Scarlet Windster