Bon Dia, partner di RNW

Notisia den kolaborashon ku nos partner na Aruba.

ORANJESTAD – Mientras cu tur hende ta den espera di loke ta bay pasa cu e refineria Valero na Aruba, un grupo di trahado Rubiano a muda pa Corsow pa bay yuda e refineria Isla. Un grupo di Arubiano ta forma parti asina di e 1.000 persona cu e refineria a manda busca pa trabounan di mantencion grandi pa e refineria.

E fin di siman cu a pasa, mayoria di e trahadonan necesario a wordo transporta pa Corsow di cual tambe tin pues e Rubianonan manera cu BONDIA ARUBA a compronde.

Disgusto
Segun informacion cu tin, esaki a causa disgusto na Corsow pasobra mientras cu tin un desempleo grandi, ta manda busca 1000 hende di afo y ‘burla’ asina di esnan di Corsow. Y esaki no ta necesario pasobra por a compronde cu por lo menos 600 persona cualifica ta di Corsow mes. Pero e resto mester a wordo importa. Di otro banda e refineria a laga sa cu nan ta personal experiencia sigur den loke ta e trabou pa arma stelage. E cantidad di trahadonan fuera di Aruba, ta bin tambe di paisnan manera Venezuela, Colombia y Trinidad & Tobago, pero tambe for di Merca y Hulanda.

Ta compara e trabounan cu e asina yama ‘turnaround’ cu e refineria Valero tabata haci na Aruba tambe y manera ta conoci, aki tambe tabata necesario pa importa cantidad grandi di trahadonan manera for di Turkia y otro paisnan cu tin trahadonan cu cierto specialisacion. E trabou mas necesario ta di arma stelage halto pa asina por yega na e Catcraker. Nan ta di haltura nan specific cu ta rekeri specialisacion di stelage y e personal ey no ta cana rond na Corsow. Loke cu e refineria di Corsow ta subraya, ta cu mescos cu tempo di esunnan na Aruba, ora cu e grupo di personanan aki bin e isla, ta pa un periodo specifico y despues nan ta bandona nos isla atrobe.

Mientras cu nan ta permanece na Corsow, nan ta haci uso di e facilidadnan di e isla cu ta genera entrada tambe cu sigur ta algo positivo pa e isla, segun e refineria Isla a laga sa. No ta conoci exactamente cuanto Rubiano a bay Corsow pa e trabounan aki, y si ta trata di contratistanan cu awor no tin trabou of cu ta trata di trahadonan di e refineria cu a wordo ‘fia’ na isla.