Wer di wenter ta suta Hulanda ketu, pero tráfiko ta sirkulando un tiki atrobe. Rover, e asosiashon di biahero di trèin ta kritiká e manera ku kompanianan di transporte a anda ku problema ora ku  wer di wenter a dal aden.
 

Nederlandse Spoorwegen, o sea NS mester a informá biaheronan na drechi, miéntras ku ProRail, e gerente di mantenshon di rièl mester a prepará su mes mió, segun Rover. ProRail ta bisa ku e sneu ku a kai tabata dje tantu ei ku no por a hèndel e situashon mas. Rover ta haña ku kompanianan di bùs a pega barku. E asosiashon di biahero ku no a pensa sufisientemente riba solushonnan si surgi tempestat. Rover ta hasi un apelashon riba tur kompania di transporte pa kuminsá pensa kon evitá e tipo di problemanan akí den futuro.

P'awe djamars tambe Nederlandse Spoorwegen ta rekomendá pa no biaha ku trèin si no ta estriktamente nesesario. E trèinnan ku sí ta kore lo para na kada stashòn, i a lo sumo nan lo kore kada mei ora. E medida akí lo duna hopi retraso atrobe. Unabes ku e biahero baha for di trèin, e lo tin di warda basta ratu promé ku e por kue otro trèin i sigui su rumbo. Ayera djaluna mes e trèinnan di distansha largu (Intercity) a kai afó, i algun dje tiponan ku ta stòp tur kaminda so tabata kore, tur esaki pa motibu di sneu i eis.

Awemainta e tráfiko di kas-pa-trabou na Hulanda a bai un tiki mas mió. Riba e di seis dia konsekutivo di molèster di sneu, e problema di outopistanan será òf parsialmente aksesibel tabata algu ménos ku ayera. Komo ku mardugá a kai muchu ménos sneu ku den e dianan anterior, e katapilanan speshal (sneeuwschuivers) di Rijkswaterstaat por a libra mayoria karetera di sneu. Konkubaibin nan a keda basta limpi sí.

Fuera di esei e temperatura a subi algu riba sero grado na algun lugá na Hulanda, loke a pone yobida di sneu kambia bira finfin di awa. Na hopi siudat bùs a kuminsá kore atrobe. E stòk di salpeter, ku ta stroi riba kaya, a kaba na algun munisipio.

Na airopuerto Schiphol a pone sentenáres di strètjer den un sala grandi pa pasaheronan ku mester keda drumi debí na buelonan ku mester a kanselá.