Hopi Antiano ta benefisiá di e proyekto Speransa na Den Bosch. E proyekto akí ta guia Antianonan ku tin mester di yudansa riba diferente tereno. Pero chèns ta grandi ku Proyekto Speransa lo stòp aki kuater luna pa motibunan finansiero.

Riba petishon di frakshon di PvdA den konseho munisipal di Den Bosch, a debatí riba e proyekto. Ludwina van der Mijden, presidente di fundashon Nos Baranka i alabes inisiadó di Speransa ta splika ku si e stòp di eksistí, algun parti di dje lo bai kai bou di un otro proyekto. E proyekto nobo akí na su turno lo keda finansiá for di un otro fondo. Esaki ta nifiká ku algun parti di proyekto Speransa lo kai afó.

Segun Jerôme Moniz, coach pa Antianonan na Den Bosch, e grupo akí ta haña su mes konfrontá ku prinsipalmente problemanan finansiero. Na di dos lugá e grupo tin problema pa haña trabou, i na di tres lugá tin hóben ku mester di guia na skol. Segun Moniz ta importante pa un coach antiano kompañá i sostené e persona ku tin mester di ayudo na momentu ku esaki ta buskando yudansa.

'Nos ta hasiendo awor aki lo máksimo pa e por sigui den e forma ku e ta', asina Ludwina van der Mijden a bisa tokante proyekto Speransa. El a bisa tambe ku henter e proyekto ta kosta 90.000 euro pa aña.