Solamente 150 hende djaweps 6 di sèptèmber a partisipá na e akshon di protesta na Boneiru ku anteriormente e siman aki a anunsiá na grandi riba Facebook i den korant lokal. Ku e manifestashon diferente asosiashon di interes lokal i habitante di e isla a trata di mustra gobièrnu hulandes promé ku elekshon pa Tweede Kamer ku nan no ta bai di akuerdo ku e manera ku kos ta bai aktualmente riba e isla.

“Awe ta Dia di Boneiru, un dia di fiesta. Ma mi no ta sinti esaki niun tiki. Mi ta masha rabiá.” Maria Roserte su kana a yena. ‘Van een kale kip kun je geen veren plukken’ (Bo no por ranka pluma for di morkoi, trad.), tin pará riba e borchi ku e ta tene. “Anto t’asina mes. Nos bonerianu no tin nada mas. Ku introdukshon di dòler m’a bira pober. 10-10-’10 a benta nos den abismo.”

Nos no ta bringa
Segun hopi bonerianu tur kos a bai atras for di tempu ku e isla ‘komo ‘kuerpo públiko’ ta forma parti di Hulanda. Un aña pasá a introdusí dòler na Boneiru i a subi belasting. Aworó mester paga belasting di propiedat inmobil i di riol i preis di koriente ta subi ku 50%.

Tòg ta un parti chikitu di pueblo so tabatin kurashi di ekspresá nan malkontentu abiertamente. E presensia chikí segun Nòchi Willem di Fundashon Bon Gobernashon, un fundashon ku ta denunsiá abusu gubernamental, ta pasobra no ta den pueblo di Boneiru pa hasi guera fasil. “E señal aki ta bon mes. Pero e resultado bèrdadero di nos akshon lo sali djarason.”

Ménos voto posibel
Riba 12 di sèptèmber Boneiru mester bai vota pa Tweede kamer hulandes. Si ta na Cedric Soleano di Bonerianu Prekupá lo no tin muchu biyete di vota ta kai den e urnanan ofishal. E tin sosten di e lidernan di otro asosiashon di interes bonerianu. “Den diferente sentro di bario tin buson speshal kaminda hende por tira nan pas di vota. Mas tiki voto, mas mihó.”

Ku e bòikòt di elekshon di Tweede Kamer e asosiashonnan di interes ke fòrsa un referèndem pa habitantenan di Boneiru disidí kon mester duna nan státùs den relashon ku Hulanda kontenido. Ku kua prosedura e asosiashonnan di interes ta pensa di logra esaki no a investigá ainda. E pueblo malkontentu di tur manera no tin niun tiki fe den polítka lokal. “Lo no bini un referèndem mientras ku nos ta na mando”, diputado di Ekonomia i Finansa Burney Elhage ta deklará. “Si pueblo den elekshon nobo na 2015 skohe pa un koalishon ku sí ke un referèndem, e ora ei por organisá esaki. No mas promé.”