Na Almere PVV a gana elekshon munisipal di un manera aplastante, loke ta pone ku e partido ta esun di mas grandi na e siudat. Partido A-vip enkabesá pa Edwina Molina no a saka niun asiento. Molina ta bandoná polítika awor. Otro kandidato di orígen antiano tampoko no tabatin masha éksito den nan lucha pa voto di elektorado.

Na Den Helder partido Trots op Nederland di Rita Verdonk a saka sinku asiento. Esei ta pone ku e partido ta bira un di esnan mas grandi di e siudat. Viktoria di Trots op Nederland ta parse di a bai a kuesta di Partij van de Arbeid, ku a wak su kantidat di asiento baha ku mitar. Na Almere tambe e partido sosial demókrata a pèrdè asiento, kuater den e kaso aki.  
 
Parse ku na siudatnan kaminda tin hopi Antiano i Rubiano ta biba, PvdA a pèrdè mahos. Na Dordrecht i Den Helder e kantidat di asiento die e partido ta baha ku mitar. Aparentemente na siudatnan ku hopi Antiano i Rubiano D66 ta sali ganadó ku eksepshon di Dordrecht. VVD, CDA i GroenLinks ta mantené nan posishon anterior. Ta na Tilburg so VVD a dòbel su kantidat di asiento.
 

Bandoná polítika
Den su reakshon riba un resultado desepshonante pa su partido na Almere, Edwina Molina  ta bisa di ta respetá eskoho di Antiano i Rubiano i ku e ta bandoná polítika. 'Awor mi ta bai gosa di bida'. Molina tin 55 aña i ta haña ku despues di a dediká tantu aña na polítika, ta tempu pa bai enfoká su mes kompletamente riba su trabou. 'E votadónan, inkluyendo Antiano i Rubiano, a skohe pa partido grandi, asina e ta bisa den su análisis. Molina no ta sigui ku su partido A-vip te ku aña 2014.

 
Raymond Labad, presidente di movementu MAAPP tambe ta haña e resultado di elekshon desepshonante. Di e kuarenta kandidato pa elekshon munisipal tin sigur sinku ku ta drenta konseho, esaki ta ménos ku e kantidat di ocho te diesdos ku MAAPP a pronostiká. Pero Labad ta tene kuenta ku kos por kambia un krenchi ainda: Tin un grupo ku mester warda wak si nan a haña voto di preferensha i ku mester wak tambe si nan partido ta bai forma parti di koalishon. Di e forma ei algun Antiano lo por drenta konseho ainda.
 
Kansá di polítika
Segun Labad tiki hende a bai vota pasó nan ta kansá di polítika. E no ke desistí sí di hiba kampaña pa motivá votadónan pa nan bai urna. Labad ta hasi un yamada na polítikonan pa nan kumpli ku loke nan a primintí. 'No warda te aki kuater aña pa bo bai papia ku esnan ku bo ta representá i ta kere den bo. Hasi e kos ei kuater aña largu.'
 
Eindhoven
Kandidato Thirza Rojer di orígen kurasoleño, tabata pará na di ocho puesto riba lista di CDA na Eindhoven. E ta un di esnan ku tin di warda wak si el a haña voto di preferensha òf warda formashon di koalishon. 'Por ta bon bon ku mi por drenta aden tòg.' Rojer ta di akuerdo ku e análisis di Labad ku votadónan ta kansá di polítika. 'E hendenan ta bisa: boso no ta hasi nada tòg.' Rojer ta dirigí su mes tambe riba e otro iglesianan di migrante i ke sigui hasi esei durante e kuater añanan benidero.
 
Amsterdam
Na Amsterdam Instituto pa Migrashon i Estudio Etniko ta investigá kon votadó di orígen alóktono a hasi nan eskoho. For di e investigashon akí ta sali na kla ku 53 porshento so di Sürnam i Antiano a skohe pa PvdA , siendo ku na 2006 esaki tabata 79 porshento. GroenLinks i D66 a atraé mas tantu votadó nobo di e gruponan akí.
 
Na Amsterdam e biaha akí tin mes tantu Sürnam, Antiano, i Rubiano a bai vota ku na elekshon munisipal anterior. Pero e kantidat ta masha limitá. Ta trata di 26 porshento, siendo ku 39 porshento di Marokano i 39 porshento di Turko a bai basha bala.
 

Amsterdam Zuidoost
Na Amsterdam Zuidoost PvdA a pèrdè sinku di e dieshete asientonan ku e tabatin. E resultado no ta definitivo ainda pasó VVD lo por kuestioná e resultado eventualmente. Esaki debí na e echo ku un kandidato klave, esta esun ku a subi lista no pa keda elegí sino pa atraé mas tantu votadó, no tabata aparesé riba e lista di kandidato. A drecha e fayo akí den kareda di dia, pero ta posibel ku lo tin di bolbe bai urna na Amsterdam-Zuidoost.