Un temblor leve a spanta hende awé na Sint Maarten i e islanan bisiña, esaki ta un notisia ku a kaba di sali den e korant ulandes De Pers i den Amigoe na Antia. Turista i habitantenan di e isla a kore sali for di e edifisionan, pero te awor no a drenta notisia di daño ni di víktima.

E temblor tabatin un magnitut di 4.5 i por a sintié entre otro na Sint Eustatius, Anguilla, St. Barts i St. Kitts. Sentro di e temblor chikí tabata ubiká na ost di Sint Maarten, na un profundidat di 35 kilometer bou di superfisie di laman.

Jackie Joseph, habitante di bario Sint Peters, a konta ku much'i skol a kore sali for di klas na gritu. Na e barionan ku vários sentro komersial n'e isla tambe desénas di hende a kore sali pafó morto spantá.