Siman pasá djarason e telefòn públiko na Playa Grandi a kumpli 50 aña di eksistensia. Ku eksepshon di algun periodo di un par di luna ku e tabata dañá, e telefòn aki a funshoná tur 50 aña. Hilda Coffie huntu ku su ruman Joaquin i Celia Melaan a selebrá e echo aki ku un brindis di anis.

Dia 23 di mei 1962 a hasi e promé yamada for di e telefòn públiko aki, situá djis pegá ku kas di Balthasar Coffie na entrada di Playa Grandi. Na e okashon ei tabata presente e hefe di Telefoondienst dje tempu ei señor Ekkebus, kompañá pa su personal. Pa e trahadónan tabata un echo importante, pasobra nan a traha duru pa instalá e kabel riba un distansia di sigur dos pa tres kilometer asina. Trabou duru den tempu ku no tabatin mashinnan manera tin awendia pa hasi tipo di trabounan asina.

Isolá
Playa Grandi ta e pueblo mas isolá di Boneiru. Ta un pueblo di masoménos 6 kas, situá pegá ku e entrada prinsipal di Parke Nashonal Washington-Slagbaai. E habitantenan ántes di Playa Grandi tabatin tambe hopi relashon ku e anterior plantashi Washington, na unda nan tabata traha, spesialmente kima karbon. Un parti dje habitantenan di Playa Grandi tabata desendiente di famia Neuman, e promé doñonan partikular di e plantashi Slagbaai, ku originalmente tabata inkluí tambe e aktual Washington. Famianan manera Coffie, Seraus i Thodé a biba na Playa Grandi. Thodé a bini despues, ora Clara Thodé, kende a kasa despues ku Olivero Coffie, a hasi su entrada den e pueblo aki. Su mayornan tabata kima karbon den Washington. Olivero ta ruman di Balthasar. Na momentu ku tur parti di Boneiru, for di Tera Kòrá te Rincon, tabata kompletamente riba ret di awa, koriente i telefòn, Playa Grandi sí no por a disfrutá di e utilidatnan aki.

Telefòn
Na aña 1962 Gobièrnu di Boneiru (Demokrat) a sòru pa Playa Grandi haña telefòn, loke sigur no tabata un luho den e tempu ei. Pasobra si algu sosodé den Playa Grandi promé ku 1962, ta na pia mester a bai Rincon pa pidi yudansa. Entre otro si tabatin mester di dòkter ku urgensia pa un enfermo. Mester tene na kuenta tambe ku den e tempu aya e kaminda pa bai Playa Grandi tabata di tera i na momentu di yobida fuerte tabata kasi imposibel pa yega e bario, sigur banda di e dam grandi. Ta te meimei di añanan ochenta numa a hasi e kaminda aki di betòn. Hilda Coffie: “Hopi bes nos mester a bai ku pia Rincon pa hiba kualké notisia. Bida no tabata fásil. Mi ta kòrda bon ainda kuantu alegria i alivio instalashon dje telefòn a trese na Playa Grandi”.

Balthasar
Durante e 50 aña ku e telefòn públiko aki ta eksistí, sigur 25 aña dje 50 aña aki ta trata tambe di un relashon estrecho ku Balthasar Coffie, tata di Hilda. Balthasar a haña serka Telefoondienst e responsabilidat pa tira bista pa e telefòn aki, anke ku den e tempu ei no tabatin vandalismo. En todo mester tabatin hende tambe pa tira bista riba e telefòn. Ta p’esei a pon’é na apénas tres pa kuater meter for di e kas di Balthasar, òf Mo Bata, manera su subrinunan tabata yam’é. “No tabatin mihó hende pa a kuida e telefòn aki ku mi tata. E tabata sa balor dje telefòn aki i tabatin bon bista riba tur hende ku tabata hasi uso dje aparato”, Hilda Coffie a konta. E telefòn tabata manera un yu di Balthasar.

Algu ku ta hasi e telefòn aki spesial tambe ta e echo ku e tin un number públiko. Pues hendenan por a yama tambe i Balthasar, kende na su edat haltu tabata sintá semper den un stul den hadrei di su kas, tabata lanta bai kontestá e telefòn. Si tabata respondi pa otro habitantenan di e bario, e mes òf su yunan tabata bai hiba e respondi.

Grátis
Loke tambe ta importante menshoná ta ku yamadanan for di e telefòn aki ta grátis pa telefònnan fiho riba ret di Telbo. E no ta konektá riba telefònnan selular, tampoko por yama eksterior. Hilda Coffie: “A sosodé un bia ku, debí na un fayo, por a yama rònt mundu for di e telefòn aki. Diripiente, sin ku nos mes tabata sa, hopi hende a kuminsá ta bini for di Rincon pa papia na e telefòn aki, tin bia oranan largu. Ora ku nan a bai ariba di mes fiesta a kaba”.

Balthasar a muri bai. Mayoria di su yunan a sali for di Playa Grandi, ku eksepshon di Joaquin, ku ta sintá na e mesun lugá den hadrei kaminda su tata a sinta den e último añanan di su bida. E no por kana bon i no por yega fásil mas na e telefòn públiko ku a hunga un ròl asina grandi den bida di habitantenan di Playa Grandi. Segun Hilda Coffie, ainda tin hende ta hasi uso di e telefòn aki. E tin su balor i p’esei tambe ta pidi tur hende pa kuida e konekshon aki ku Playa Grandi.