Te ainda no tin klaridat si lo trata legislashon pa islanan BES djaweps 4 di mart. Te awor e seshon plenario ta pará riba agènda, pero nada no ta sigur. Despues di kaida di gabinete Balkenende desmantelashon no ta sigur mas.

Pa por logra desmantelá dia 10-10-10, legislashon mester ta na òrdu. En bista di e situashon ku a surgi den seno polítiko na Den Haag, esei ta parse imposibel. Willibrord van Beek, presidente di komishon fiho pa asuntunan antiano i rubiano, ta bisa ku ta delikado trata leinan den un período ku no tin un gabinete kompleto ta goberná.

Pero tratamentu di legislashon pa islanan BES ta pará konkretamente kaba riba agènda pa keda tratá djaweps 4 di mart : 'Mi tin e impreshon ku tin un mayoria mas reimu ku ke finalisá e legislashon. Pero asina mes tin algun partido ku no ke esei esplísitamente i ku e gabinete demisionario akí nos tin di tene kuenta ku esei sí.'

Konsenso Leinan di Reino
Djamars 2 di mart lo tene un reunion di prosedura kaminda ta disidí si tratamentu di legislashon ta sigui 4 di mart. 'E chèns tei ku te ainda ta kit'é for di agènda. Den kaso ku posponé e tratamentu, esei ta un problema. Mester trata e Leinan di Konsenso di Reino tambe ainda. Si bo wak kuantu lei hulandes lo no keda tratá mas, lo ta masha partikular si disidí ku e leinan di Konsenso sí ta keda tratá.'

Promé minister Emily de Jongh-Elhage di Antia a kuminsá mientrastantu ku un ofensiva, pa urgi polítikonan ku no por posponé 10-10-10. De Jongh-Elhage no ke konsiderá otro senario i a manda un karta pa promé minister demisionario Balkenende i partido polítikonan den parlamento hulandes.

11-11-11 òf 10-10-10
'Te ainda mi ta  positivo, en partikular despues di e notisia di reina Beatris ku a bisa ku nos mester keda tene bienestar di Reino na konsiderashon i ku sierto kos no ta pèrmití pa posponé nan', asina de Jongh-Elhage ta bisa. 'Mi tin kontakto ku mayoria di partido. Mi ta keda positivo. Laga nos wak kiko ta sali afó.'

E promé minister ta masha okupá ta lòbi ku Den Haag. 'Van Beek, presidente di komishon fiho di parlamento ta bisa 11-11-11- pero ami ta bisa 10-10-10.  Nos a tuma algun paso ireversibel, no por bòltu e kosnan ei bèk.' 

Mientrastantu Antia ta sigui traha mané nada no a pasa na traspaso di tarea i outoridat di gobièrnu sentral pa gobièrnu insular. A disidí ku 15 di mart ta pasa e promé ministernan di pais Antia pa Kòrsou. Segun Zita Jesus-Leito, diputado di Asuntunan Estatal, a firma un protokòl tokante esei ku gabinete antiano.

Leito tambe ta dirigí su mes riba 10-10-10. 'Esei por sigui nòrmal i e ta sigui nòrmal tambe. E karteranan di Tráfiko i Transporte, Enseñansa i Salubridat ta bini pa Kòrsou. Naturalmente tin tarea ku mester keda ehekutá pa e islanan BES, ke men di esei ta sigui nòrmal. Pero e énfasis no ta riba nivel sentral sino na nivel insular.'

Leito no ta mira e peliger ku si pospon'é e ora ei tambe ta kit'é for di mesa. Loke nos a palabrá ta konta. Nos tin e chèns pa kuminsá di un forma bunita ku e paisnan nobo. Nos no mester bai tòrnu apsolutamente ku nò na esei.'