Munisipio Vlaardingen a kuminsá entrante e aña eskolar aki ku e asina yamá proyekto-Tanchi. E proyekto ta pa duna guia i sosten na mayornan di muchanan antiano i arubano na skolnan básiko den e bario Westwijk na Vlaardingen. Un tanchi ta un persona antiano ku ta fungi komo intermediadó entre famianan antiano i arubano, skolnan i institushonnan gubernamental. Antiano Alexandra Francisca ta inisiadó dje proyekto Tanchi despues ku el a tende di skolnan ku ta bai malu ku hopi mucha.

Problemanan ku muchanan antiano i arubano tin na skol tin relashon ku nan situashon na kas. E tanchinan na Vlaardingen por yuda solushoná problemanan familiar. Alexandra Francisca tambe ta un tanchi i ta guia i duna mamanan sosten. "Mi a keda hopi preokupá despues di un investigashon ku mi a hasi na skolnan na Vlaardingen. E skolnan tin keho ku tin mucha ku retraso soshal emoshonal, ta bin skol tin bes sin kome i sin baña. Òf ku nan tin problema ku siñamentu."

Hopi antiano
Vlaardingen ta un dje asina yamá 'Antillianengemeenten' kaminda relativamente mirá hopi Antiano ta biba. Un gran parti dje komunidat antiano ta biba den e bario Westwijk. Pa e motibu ei e proyekto a kuminsá den e bario ei. Tin famia antiano na Vlaardingen ku problema finansiero, mayornan ku a kai ser òf drenta den kontakto ku polis despues ku nan a hòrta. Tambe tin dos te tres famia ku ta biba huntu den ún kas. Segun Francisca tur e problemanan akí tin influensha riba e muchanan di skol.

Señalá problema
Francisca ta menshoná problemanan serio ku e ta enkontrá, pero e tanchinan no por solushoná tur kos. "Nos no ta trahadó soshal. Nos a haña trénen kon pa anda ku e problemátika. Nos ta señalá e problemanan i dirihínan pa por ehèmpel kuido pa hubentut i otro instanshanan kapasitá ku por yuda nan."

E proyekto Tanchi ta kana e aña eskolar akí i na final Alexandra Francisca ta spera na tende dje skolnan ku ta bai mihó ku e muchanan di skol. Tambe e ta spera ku mayornan antiano ta mas enbolbí den enseñansa di nan yunan.

Skucha un entrevista ku Belkis Osepa a tene ku Tanchi Alexandra Francisca.