"Ta un coup afrikano e ta", palabranan di Ed Gumbs, miembro di PvdA, sekshon Amsterdam Zuidoost. Gumbs ta di opinion ku tin muchu Afrikano, den e kaso akí Ganes, riba e lista di kandidato di e distrito pa elekshon di konseho munisipal na Hulanda na mart di 2010. E siman akí a presenta e lista na e demas miembronan di e partido di labor aki na Hulanda.  Ana Alcantara i Lorna Wilson-Koenen (nasé na Sint Maarten na 1954) ta e úniko Antianonan riba lista. Ambos kandidato ta haña ku e lista no ta reflehá komposishon di komunidat di Amsterdam Zuidoost.
 

Ana Alcantara a nase na Antia na 1949. Na Kòrsou e tabata direktor di "Fundashon pa Konsumidó' 15 aña largu. Tambe e tabata doño di un agensia di biahe i representante di Aerotur, un ofisina di biahe dominikano, tempu ku e tabata biba na Antia.
 

E tin basta aña kaba na Hulanda i hopi hende konosé komo un persona determiná, sosial i komunikativo, ku no ta sinta warda pa tuma akshon. E ta lantando NANTO o sea "Netwerk voor Antilliaanse en Arubaanse Ondernemers Organisatie".

Aktualmente Ana Alcantara ta miembro di partido PvdA. E tabata 13 riba lista di partido pero awor el a baha na puesto 14. Alcantara no ta di akuerdo ku komposishon di e lista: "Mi ta ripará ku ta ún nashon tin, ku kasi ta dominante riba e lista. E nashon ku ta dominá kompletamente ta e Afrikanonan. Si bo tin ún nashon so riba posishonnan klave, e por trese un sierto desbalanse den henter e gobernashon. Pero tur kos ta keda na elekshon i 'voorkeurstemmen'. Si e pueblo no ke bo, nan no ta vota pabo tampoko." 

Kustumber bieu
"Lamentablemente nos Antianonan no ta gusta bai urna. Nan a keda ku e tradishon bieu ku bo tin ku vota pa bo haña kos. Mientrastantu ku nos keda pensa 'kiko mi por haña dibo' i nos no vota pa un programa di partido, otro nashonnan ta pasa nos bai."  Alcantara ta ripará ku tin un grupito di Antiano ku no ta bai vota den Zuidoost, pero ku tin boka grandi si. "Na promé lugá mi ta bringa pa e munisipio Zuidoost, pero na di dos lugá mi ta bringa ku alma i kurpa pa nos mes hendenan!"

E ta konvensí ku su tarea ta pa lanta nos hendenan for di soño i pa siña nan kiko ta polítika.
Ed Gumbs tambe ta di opinion ku mester traha riba e kos akí.

Skucha Ana Alcantara i Ed Gumbs den kòmbersashon ku Romeo Hoost.