Sospechoso di pornografia di mucha Stephen Sudduth ta den deliberashon ku Fiskal na Texas (Merka) tokante un rekonosementu di kulpa pa e haña redukshon di kastigu. Esei ta loke Ministerio Públiko di Sur di Texas ta informá. E kaso den korte pa e momentonan akí ta keda aplasá te na aprel.

E èks lider di kleuter ta akusá di a hasi maluso di mucha i di a filma kleuternan, entre otro na International School na Kòrsou. Na 2009 el a keda detené na Merka i el a tende nan eksigí kastigu di trinta aña di kastigu p’e. A aplasá e kaso mas biaha, pasobra Ministerio Públiko tabata bisa kada bes di tin mester di mas tempu pa haña mas prueba pa por ‘sera Sudduth pa tempu mas largu.’

No tin kaso na Kòrsou
Apesar di e hecho ku tin prueba ku Sudduth den e periodo di ougùstùs 2007 te yüni 2009 a malusá kleuter na International School na Kòrsou, no tin kaso te ainda kontra dje na Kòrsou. “Nos no ta ekskluí un investigashon penal i persekushon kontra Sudduth na Kòrsou, pero nos a skohe pa kaba di warda kon ta atendé e kaso na Merka”, di akuerdo ku bosero pa prensa Ludmilla Vicento. “Ta trata di un kaso grandi ku na Merka nan tin mas material i hende pa traha ariba. Ademas e kastigunan na Merka ta mas haltu ku aki na Kòrsou pa loke ta akusá Sudduth di dje.”

Pa start ku un kaso penal na Kòrsou kontra Sudduth, Ministerio Públiko mester tin prueba. E prueba ei por varia di materialnan ku ta kontené imágen te deklarashon di testigu òf denunsia di víktima. Si e último ei a keda hasí, esei Vicente no por hasi deklarashon.

Kooperashon
E pruebanan di e akshonnan pornográfiko di Sudduth na Kòrsou segun Ministerio Públiko na Texas a bini na kla dor di kooperashon entre Merka i Kòrsou. Según Vicento a kooperá dos bes ku un petishon di Merka. Loke a keda investigá e tempu ei e no por bisa eksaktamente.
Según Kriminóloga Nelly Schotborgh-Van de Ven, kumpli ku un petishon pa kooperashon ku hustisia ta enserá ‘ku paisnan ta duna otro aprobashon pa wak den e dosiénan di e akusado, pone beslag riba kòmpiuter, interogá hende i akumulá material di prueba.’

Deadline
Si Sudduth por yega na un akuerdo ku Fiskal General di Texas, e ora ei e kaso no ta aparesé dilanti di un hurado merikano. Dia 23 di aprel Fiskal General di Texas i hues lo deliberá ku otro tokante e kaso. Si e ora ei ainda no a yega na un acuerdo algún siman despues ta sigui e kaso den korte.