Studiantenan nobo di Antia i Aruba ya ta na Hulanda pa kuminsá nan estudio e aña eskolar akí. Sekshon Papiamentu di Wereldomroep ta tene kontakto ku e studiantenan i tambe ku nan guia pa sa kon ta bai ku nan, kon nan ta eksperenshá Hulanda i pa sa tambe tokante desaroyo di nan estudio. Por lesa i skucha entrevistanan i tambe relatonan personal dje studiantenan mes, tokante nan bida na Hulanda.
 
Fröndaly Martina (32 aña) mèntòr na Utrecht pa Stichting Studiefinanciering Curaçao (SSC) i alabes studiante Trabou Sosial i Servisio:
"E aña akí Utrecht a haña 43 studiante nobo antiano. Durante e siman di introdukshon nos a duna nan informashon pa nan siña konosé Hulanda mihó. Tambe pa nan sa kiko ta e kosnan di promé nesesidat ku nan mester sa. Tin studiante ku nunka no a bin Hulanda i no ta na altura dje kosnan ku ta pasa akí. Ta nos deber pa informá nan di loke nan mester sa."
 
Enkuentronan informativo SSC
"Nos ta informá nan di por ehèmpel nan finansiamentu di estudio, nan kamber, soa i sèks, polis i tambe tokante droga. Semper ta bon pa tin informashon èkstra. Mas aleu nan lo haña tambe informashon di abilidatnan soshal i kon pa presupuestá. Tin diferente tópiko ku lo tuma lugá den henter aña eskolar."
 
Reakshon
"E promé siman e studiantenan tabata ke sa mas di nan kamber i finansiamentu di estudio. Nan ke sa kon tur kos ta hinká den otro. Nan a haña informashon na Kòrsou, pero akí tambe nos ta informá nan. Tambe a duna informashon tokante asuntunan bankario, por ehèmpel kon pa habri un kuenta na banko. Nan a risibí e informashonnan hopi bon. Tin dje studiantenan ku a yega bin Hulanda kaba i sa sierto kos kaba. Tin di nan ku a haña informashon di nan mayornan. En general tur hende a reakshoná positivo."

 
Clancy Zimmerman (23 aña) studiante ICT Systeem Beheer (Nyenrode) na Utrecht:
"Ora mi a baha for di avion i sali for di Schiphol tabatin tempu malu, ounke ta zomer. Un airu friu tabata supla. Mi no a fèrwagt e friu, pero e tabata tolerabel."
 
Promé biá na Hulanda
"Nos a bai nos kamber. Nos a siña konosé e siudat, kon ta kohe bùs i konosé serkania. Ta fásil biba na Hulanda, pero ora kos no ta bai bon bo mester ta fuerte pa dal bai. No ta tur kos ta bai fásil. Bo no mester ta floho i laga kos pasábo bai. Bo mester ta duru, lanta for di soño na tempu, buska kos pa sa i atendé e-mail mésora."
 
Informashon
"Mi a haña e enkuentronan di informashon hopi bon, pasobra a informá nos di hopi kos ku nos no tabata sa. E enkuentronan ta bon pa partikularmente esnan ku a bin Hulanda promé biá, ya nan no ta haña nan den problema. Pami e informashonnan tabata sufisiente. Mi ta kla pa kuminsá ku mi estudio."