Elekshon i e kambionan estatal tin tur atenshon di e bùrsalnan di Sint-Maarten na Hulanda. Djaweps 16 di sèptèmber algun di nan a bini huntu na Amsterdam pa diskutí tokante futuro di e pais i elekshon. 'Mi ta haña lástima ku mi no por vota.'

Mayoria di e studiantenan ta puntra nan mes si nan isla natal ta kla pa bira pais outónomo. Kriminalidat tin nan prekupá, pero tambe e echo ku no tin trabou pa hóbennan. 'Mi no ta masha partidario di 10-10-10. Sint-Maarten mester kambia hopi kos pa e pais drecha. Tin masha kriminalidat, gobièrnu no ta organisá. Ami ta haña ku e fecha ta muchu trempan,' asina studiante Jacklin ta bisa.

Si Jacklin lo por a vota pa elekshon di djabièrnè 17 di sèptèmber su voto lo a bai pa UP-Party. 'Nan ta positivo i nan tin otro idea.' Jacklin no sa si e ta selebrá e dia di desmantelashon. 'Kisas mi ta dal un serbes.'

Kriminalidat
Un otro studiante ku ta presente, a bai sinta huntu ku su amigunan pa nan komentá kon elekshon ta bai. E ta duda si Sint-Maarten ta kla pa bira pais. Un studiante di business administration ta haña lástima ku e ta na Hulanda awor i ku e no por vota. 'Mester hasi algu na kriminalidat. E isla mester bira un isla amabel atrobe. Tin biaha mi tambe tin miedu pa bai bèk, mi ta tende asina tantu historia negativo.'

Asina mes no ta tur hende ta negativo tokante 10-10-10. Tin un pipita di studiante presente ku ta anhelá pa Sint-Maarten bira independiente. 'Nos tin derecho riba outonomia. Porfin nos ta bira politikamente independiente di Hulanda.'