Un grupo di diesinku studiante antiano i arubano di Utrecht te ainda ta sin kas. Djabièrnè 4 di sèptèmber a saka nan pafó riba òrdu di alkalde di Utrecht. Munisipio i kuerpo di bombero ta bisa ku e edifisio, kaminda a akomodá e studiantenan, ta sumamente inflamabel.

A pone un total di shen studiante riba kaya. Mayoria a haña kamind'i keda serka famia òf amigu. Ocho di nan (studiante di di dos aña) por a warda nan kosnan provisoriamente den edifisio di Stichting Studiefinanciering Curaçao (SSC) na Utrecht. A stiwa banki, máikroweif, televishon i otro artefakto di uzo doméstiko den un sala di reunion di ofisina di SSC. Gerente Lucille Hoelen ta bisa ku ta muchu karu pa hür un lots.
A desarmá hopi kos i nan ta pará tur bruá den otro. Hoelen 'no ke ni pensa mes' kon e studiantenan mester distinguí te pa haña nan kosnan bèk despues. N'e momentu akí e ta fokes primeramente riba akomodashon di e studiantenan, ya ku nan no por keda muchu ten tampoko serka famia i amigu. Tin di nan ta keda leu for di Utrecht, kaminda nan ta studia. "Anto aña studiantil a kaba di kuminsá, loke ta enserá mester kumpli ku tareanan importante."

No tin sèn
E studiantenan antiano no tabata sa nada di peliger di kandela den e edifisio, kaminda nan tabata biba. "E doño sí tabata na altura, pero no a hasi nada pa remediá e situashon." No ta konosí si nan lo haña sèn bèk ni kiko mas mester sosodé. SSC no tin sèn pa paga akomodashon pa tanten, segun Hoelen, pasó e organisashon a kaba di akogé i alohá studiante nobato, ku a matrikulá pa nan promé aña di estudio. "Nos ta purba duna nan un tiki ánimo. Ban wak si nos por haña supsidio."
Ainda no a tende nada di munisipio di Utrecht despues ku Hoelen a manda pidi yudansa. SSC ta spera ku e studiantenan por regresá lihé n'e edifisio ku nan mester a bandoná un siman pasá. Hoelen no por bisa riba ki término esaki lo tuma lugá.
 

Arubano
Arubahuis a akomodá e studiantenan arubano pa tanten na hotèl Ibis. Un di nan a bai keda serka famia. Ta trata di studiantenan di e promé aña studiantil, ku a kaba di yega Hulanda. Arubahuis ta purba haña bibienda remplasante mas rápido posibel pa nan.