‘Vota pasobra ta bo derecho i no pasobra votamentu ta yuda pa algu”. Esaki ta opinion di algun stasiano ku a disidí di partisipá na elekshon di Tweede Kamer awe. Mayoria di stasiano ta preferá di keda sin vota pasobra nan no tin niun idea riba kua partido nan mester vota òf kiko e partidonan aki por nifiká pa nan.

Ta promé be for di dia ku Sint Eustatius ta un munisipio di Hulanda ku stasianonan tambe por vota den elekshon di Tweede kamer riba 12 di sèptèmber. No ku nan tin muchu interes. “Nos no a haña sufisiente informashon i nos isla no ta haña atenshon den kasi niun programa di partido”, ta e reakshon general.

Duna un señal
Esun ku sí skohe pa vota ta hasi esaki espesialmente pa ‘duna un señal’. “Kon ku bai bin nos ta parti di Hulanda i nos tin derecho di vota, ke men nos mester laga nan skucha nos bos, maske kon chikitu e ta, pa nan sa ei na Hulanda ta kiko ta nos opinion”, shafùr di taksi Bobby Berkel ta konta. “Bo n’ ta kere ku ora elekshon kaba nan lo wak kiko nos a vota? Di tur manera ami ta bai vota pa Pechtold di D66. Un dia el a pasa aki i mi a hañe hopi bon.”

Èks miembro di konseho insular Eric Hernandez no ta kompartí Berkel su opinion: “Keda sin vota masalmente, esei lo lanta nan for di soño na Hulanda. Pasobra laga nos papia frankamente, ei na Hulanda nan no ta interesá den nos niun tiki. E elekshonnan aki ta djis pa sho. Si nos tur keda sin vota nos ta mustra ku nos no ta partisipá na e wega aki.”

Muchu poko envolvimentu
Mayoria di stasiano a disidí di no bai vota, no pa duna un señal sino pasobra simpelmente nan no sa kiko nan lo mester vota. “E asuntu ta hopi leu fo’i kas pa mayoria di stasiano”, un dosente ku ta duna lès di hulandes na adulto hoben riba e isla ta bisa. “E partidonan no a bini aki visibelmente ku un kampaña òf algu asina, ademas pa mayoria no ta kla kua partido ta sali na nos interes aki.”

“Nos hendenan di e isla aki ta mas kustumá pa vota pa persona, no pa partido”, un otro hòmber ta bisa. “Kisas lo a hasi mas diferensha si un partido tabatin un hende riba lista ku ta bini djaki i ku ta karga nos interesnan na pechu. Mi tin sigur ku por ehèmpel Cynthia Ortega- Martijn lo a kue hopi voto di BES anto lo no tabata importante mes riba kua lista e ta pará.”

E echo ku un voto stasiano lo no hasi muchu diferensha riba e resultado final no ta importá mayoria di stasiano masha. “Nos ta kustumá di tin un bos chikí, esei tabata asina kaba for di tempu di Antia. Pero e tempu ei tabata tene kuenta ku nos sí i sikiera nos tabatin representashon” un homber ta konta. E ta bai vota espesialmente ‘for the fun of it’.

Ounke e smak ta poko marga taksista Berkel ta mira e humor tambe di e situashon: “Aworó ora nan bai konta voto di Statia i Pechtold haña un voto so, sikiera e sa ta di ken el a hañ’é.”