Ta un bendishon ku e elekshon di Staten di
yanüari di otro aña ta sigui nòrmal”. Asina
Ed Gumbs, presidente di Plataforma di
Polítikonan Antiano i Arubano na Ulanda ta
bisa. Lo no strañ'é si e proseso di
desmantelashon dura muchu mas largu.

Aktualmente polítikonan no ta okupá mas ku
renobashon estatal, pero ku elekshon. "Tur
ten mi a duda ku lo alkansá e fechanan
menshoná pa desmantelashon di Antia
ulandes." Asina ta ku Gumbs ta kere ku
kisas e Parlamento antiano nobo lo sinta
henter e término di kuater aña.

Gumbs ta haña ku posponementu di elekshon
lo manda un señal masha malu mes pa
demokrasia.
“Gobièrnu Sentral a realisá ku e kaminda ku
e kier a kana no ta kos di purba mes. Regla
ta den nos demokrasia parlamentario ku ta
tene elekshon kada kuater aña, moda ku
siudadania por husga e último kuater aña di
gobernashon. Esaki ta un tradishon bunita
ku nos mester konservá", asina Gumbs a
bisa.

Gumbs ta di opinion ku e proseso di
desmantelashon no ta motibu pa pusha
demokrasia un banda. "Tin vários motibu pa
pa keda sin tene elekshon. Un di e
motibunan por ta ku oposishon ta bin na
poder i e or'ei lo e ke drèi tur kos bèk."
Gobièrnu ta bisa ku mester tin sufisiente
sosten pa posponé elekshon. Ta p'esei ta
sigui tòg ku elekshon. "No ta asina ku e no
ta posibel hurídikamente, pero e or'ei
mester tin un base di apoyo sufisientemente
amplio na tur sinku isla. Mi ta sali for di
e punto di bista ku ta esaki gobièrnu a
rekonsiderá", segun Gumbs.

Optimismo grandi di koalishon
Promé minister antiano De Jongh-Elhage ta
mashá optimista i e ta konta ku un triunfo
tremendo di su partido den elekshon
benidero. Gumbs ta bisa ku n'e último
referèndem a resultá ku e siguidónan di e
koalishon aktual ta kasi mes tantu ku esnan
di oposishon. Si relatá e kos akí ku
elekshon anto e or'ei e ta nifiká un nochi
elektoral yen di suspenso. "Mi mester
atmití sí ku mi ta kere ku partido PAR di De
Jongh-Elhage tin basta chèns di gana
elekshon, ya ku e por pone un resultado di
negosiashon riba mesa ku realmente e por ta
orguyoso di dje."