Un delegashon di miembronan di parlamentu i senado hulandes ta kuminsá dia 2 di yanüari ku un bishita di trabaou na islanan karibense den reino. E bishita di trabou ta kuminsá na Kòrsou, despues e delegashon ta sigui pa Aruba, Bonaire, Sint-Eustatius, Saba i terminá na Sint-Maarten. Einan e Konsulta Interparlementario di Reino lo tuma lugá di 10 pa 13 di yanüari.

E delegashon ta kuminsá su bishita di trabou na Kòrsou. Nan lo papia riba entre otro bon gobernashon i kolaborashon. Brigitte van der Burg, presidente di e komishon enkargá ku relashonnan den reino, ta guia e delegashon. Van der Burg ta haña bon pa sondeá i sa kon e esfera na e islanan ta: "Ta bon momento pa tende kiko ta bai bon i kiko nò. Mi no por warda pa topa ku e pueblo di Bonaire, St- Eustatius i Saba".

Kòrsou ta e promé isla ku e delegashon ta bishitá. Ultimo lunanan parlamentu hulandes a diskutí hopi riba maneho di e isla. Tòg Van der Burg ta positivo i ta biaha ku un mente habri pa e isla. E delegashon di parlamento i senado hiba un bishitá na hòspital. Pueblo di islanan BES lo por akudí na e hòspital na Kòrsou ora ku nan no por haña bon ayudo na nan propio isla. "Nos a bira un pais karibense i nos tin ku sòru ku pueblo ta haña bon kuido", segun Van der Burg.

Bishita na islanan BES
Ta remarkabel tambe ku e delegashon ta bishitá islanan BES. For di 10-10-'10 e komishon no ta enkargá ku e islanan ei. Pero Van der Burg ta splika ku tòg esaki ta nesesario pasombra e habitantenan difisilmente por drenta den kontakto ku ministernan konserniente. Van den Burg:"Na un manera informal nos a regla ku e parlamentarionan ta mustra boseronan di e ministernan riba e echo ahinda tin tres munisipio den parti karibense di Hulanda. Awor nos ta bai di bishita pa tende kiko ta reina na e islanan ei."

Otro siman e konsulta interparlemantario ta kuminsá na Sint Maarten. Durante e konsulta e delegashonnan di Staten-General, di staten di Aruba, Kòrsou i Sint-Maarten lo reuní ku otro bou di guia di presidente di staten di Sint-Maarten, señora Gracita R. Arindell. Un di e puntonan riba agenda ta e posibilidat pa traha huntu riba tereno di salubridat, adolesente i hubentut i transporte den e parti karibense di reino. Banda di esei ta trata entre otro tópikonan tékniko hurídiko, polítiko i lei di estado.