Sparta, e klup ulandes di futbòl den promé divishon lo yuda Aruba hisa su nivel di futbòl. Fin di siman  pasá promé minister Eman di Aruba i Sparta a firma un asina yamá 'letter of intent'. David Abdul, un futbolista arubano ku ta kompetí pa Sparta di Rotterdam ta mashá kontentu ku e koperashon entre Aruba i su klup futbolísitiko.

Tin tres Rubiano ta hunga bala serka Sparta di Rotterdam. Eric i David Abdul i tambe Joshua John. David Abdul ta delantero di e ekipo di Rotterdam. E echo ku Sparta a skohe pa Aruba komo partner tin di aber ku e tres futbolistanan arubano den seno di e klup, segun Abdul. "Mi ta kere ku esaki a hunga un ròl sí."

E ta splika ku Sparta ta e úniko klup n'e momentunan aki, ku ta duna formashon mbo na mucha bou di 22 aña, pa despues nan mes por bira un bon hungadó òf coach futbolísitiko. Algu ku ni Ajax, ni Feijenoord, ni PSV ta hasiendo asina ta ku Sparta tin e primisia riba e tereno akí.

David Abdul ke sigui desaroyá su mes i e ke keda un rolemodel pa hubentut di Aruba.
E ta kere tambe ku no ta di un banda so e koperashon ta bai ta. Sparta lo kontribuí ku oumento di nivel deportista na Aruba, pero Aruba mes tambe tin hopi di ofresé e klup. Tin hopi talento ta kana rònt na e isla i ku guia adekuado nan por logra hopi kos.