Parlamentario pa SP Ronald van Raak ta eksihí aklarashon di gabinete hulandes tokante salario haltu ku un èks minister di Sint Maarten a risibí. E korant Antilliaanse Dagblad di 24 di òktober a informá ku un èks minister lo a risibí salario tripliká. Radio Nederland Wereldomroep a komprondé di un fuente konfiabel ku ta trata di Linda Richardson.

A ofresé e èks minister despues di su retiru un trabou simpel na Hulanda ku un salario di 12.500 euro pa luna. Van Raak ta bisa ku el a wak e kòntrakt i e ta bisa ku esei ta meskos ku hortamentu di plaka.

E èks-mandatario a haña aparte dje salario basta un par di bónùs, manera entre otro kompensashon pasobra e mester a bandoná Sint Maarten i bin biba akí na Hulanda pa e trabou nobo. Tambe el a haña pago pa por biaha un bes pa aña ku henter su famia pa pasa vakansi na Sint Maarten.

Esaki ta hortamentu legítimo ku mester para. "Mi ke pa e para inmediatamente. Mi ke hasi un apelashon na e èks polítiko pa entregá parti dje plaka bèk. Kiko ku e èks polítiko hasi, pa loke ta trata tur trabou ta hortamentu di plaka. Esaki ta indesente pa ku e pueblo di Sint Maarten."

SP ta teme ku e kaso akí no ta úniko, i ke sa di sekretario di estado Ank Bijleveld si otro èks-polítiko antiano tambe a haña tipo di kòntrakt laboral lukrativo asina.