Sopran Tania Kross a bira miembro di e komité 200 aña di Reino Hulandes. E komité aki ta bai prepará selebrashon di e fecha históriko akí. Selebrashon di e bisentenario ta tuma lugá entre 2013 i 2015.

E kantante di opera di Kòrsou ta bisa ku el a aseptá e enkargo pa bira miembro di e komité pasobra e mes ta sintá ku yen pregunta relashoná ku selebrashon di 200 aña di Reino Hulandes. Asina Kross, aktualmente na Oustria pa un produkshon, ta puntra su mes ta kiko nos ta selebrá, dikon i kon ta bai selebrá? E ta spera di haña kontesta riba e preguntanan. Kross ta kere ku e por logra esaki tambe ku ayudo di tur hende ku tin un idea. Ta p'esei e ta hasi un apelashon na un i tur pa manda 'nan ideanan via di Wereldomroep' p'e.

E selebrashon di 200 aña di eksistensha di Reino Hulandes ta tuma lugá di 2013 pa 2015 den tur parti di Reino. Tania Kross ta kere ku e, komo yu di Kòrsou ku a biba mitar di su bida na Kòrsou i e otro mitar na Hulanda, por komprondé hendenan di tur e diferente partinan di Reino.

Pa Tania Kross ta importante pa durante e selebrashon enfoká riba e echo ku apesar ku Reino ta konsistí di 'diferente sort'i nashon i hende, ku tòg nos tur tin algu komun'.