E Godfried Bontenbal Technical Center na Saba ofisialmente a keda tumá den servisio djaluna. E anterior fábrika di siñamentu na Cove Bay despues di un renovashon i restourashon intensivo a bira awor e lugá kaminda ta duna e formashon tékniko na  Saba Comprehensive School (SCS).

Na novèmber aña pasá reina Beatrix a bishitá e skol, ku e tempu ei tabata duna muestra di ta algu presentabel, pero ku ainda no tabata kla. E programa ofisial a kuminsá djaluna ku interpretashon di himno di Saba dor di sinku alumno di SCS i bendishonamentu di e edifisio dor di Pastor Libert.
Godfried Bontenbal Technical Center op Saba

Skill is Power
Parti di e festividat di apertura tabata e kick-off pues inisio di e kampaña Skill is Power (Abilidat ta poder). E kampaña ta desaroyá den kooperashon ku Saba Comprehensive School huntu ku Foundation Social Workplace Saba. E meta ta pa mustra hóbennan, nan mayornan i nan famia importansia di profeshonalismo den fishi. I ku enseñansa di profeshon ta ofresé un bon perspektiva pa futuro. 

Enseñansa tékniko ta duna provishon den nesesidat lokal na hende ku preparashon amplio di fishi. Den lokalidatnan bon ekipá e alumnonan por praktiká den e asignaturanan tékniko manera: lasmentu, fèrfmentu, karpinteria, trabou di mètslá, trabou di paipfeter i elektrotéknika.

Alumnonan ku terminá e trayekto di kuater aña akí, ta risibí un diploma rekonosé pa gobièrnu hulandes na nivel di vmbo (ruta edukativo profeshonal básiko). Kuminsando ougùstùs 2012 e alumnonan lo por sigui nan kurso riba un siguiente nivel.

Multimedia
Durante e trayekto di e kampaña ‘Skill is Power’, di mart te yüni, lo por mira poster tur kaminda riba e isla di alumnonan lokal  ku ta siguiendo un kurso profeshonal kaminda nan ta konta pakiko nan a skohe esaki i loke ta nan plannan pa furturo. Pero tambe di algun profeshonal di fishi, ku ta konta kon bini nan a resultá den nan fishi.

E alumnonan akí i e profeshonalnan tambe lo transmití nan mensahe pa medio di un serie di aviso den korant. Lo tin un spòt di radio, den kua ku variashon un alumno i un profeshonal lo konta tokante nan kurso òf nan fishi.

E kampaña ta haña sosten dor di e página di Facebook ‘Skillispower’ ku informashon tokante e kampaña, riba kua entre otro semanalmente ta presentá un profil di fishi pa informá hóbennan tokante posibel fishi i profeshon i e trayekto di kurso pa yega na e fishi i profeshonnan ei. E profilnan akí lo ta disponibel na lugánan públiko den forma di pamflèt.

Otro islanan
E variante boneriano di e kampaña akí a start mas promé, for di 3 di mart, mientras ku Sint Eustatius lo sigui na aprel.