Embahadornan i otro diplomátikonan haltu na Den Haag ta abuzá i ta sera personal den kas. Vários sirbienta a bisa e kos akí den deklarashon pa Wereldomroep i diario Trouw.

Kriá indones di un diplomátiko suramerikano mester a entregá su pasport i su kontrato laboral, e no tabatin mag di sali for di kas i e mester a traha shete dia pa siman pa tiki sèn. Sirbienta filipino di un èks embahador saudita tambe mester a entregá pasport anto sinku aña largu no a lag'é sali for di kas, te ora ku el a hui bai ku su yunan. Hurista Antoinette Vlieger ta papia di 'sklabitut modèrno’.
 
Wereldomroep i Trouw ta na altura di mas kaso di koutiverio, di abuzu i di maltrato sikolóhiko di personal na Den Haag, e siudat kaminda kasi tur embahada di estranheria ta establesé. Ta trata di diplomátikonan di Medio Oriente, Oropa, Asia i Latinoamérika, ku mayoria biá ta hasi uzo di trahadónan humilde di Filipinas òf di Indonesia, ku no sa kobra mashá pa nan servisio.