Por mehorá kuido médiko pa hende muhé na Isla Riba. Esaki segun ginekólogo hulandes Robert Verwey. E ta trahando un par di siman na Sint Maarten Medical Center pa solushoná eskases urgente di ginekólogo riba e isla.

Dos di e kuater ginekólogonan ku tabatin na Sint Maarten a bai. Esei a okashoná un eskases mésora. Pa kompensá esei Verwey a bini e isla pa par di siman. Djei otro kolega hulandes lo remplas'é. E ginekólogonan mester traha duru pa brinda bon kuido na Isla Riba. 'Nos tin 3,5 djòp fultaim pa e 60.000 habitantenan ku Sint Maarten tin ofisialmente, e 1.600 habitantenan na Saba i e 2.200 na Sint Eustatius. Pero banda di esei tin tambe hopi hende ilegal ku no ta registrá.'

Saba
Saba tin un sentro di salú ku dos dòkter hulandes. Un biaha pa luna un ginekólogo ta bishitá e isla. 'Un embaraso ta dura nuebe luna, ke men ku nos por mira e dama na estado un par di biaha.' Di e forma ei por wak na tempu si ta mihó pa e señora biaha pa Sint Maarten pa duna lus.

Verwey tin hopi eksperensha den trópiko. El a traha anteriormente na Boneiru i na Afrika. E tin masha gana pa mehorá komunikashon na Sint Maarten, pa dòkternan por yuda otro bon. 'Nos ta trahando duru riba esei'. Fuera di esei dòkternan di kas mester di mas sosten i kurso di rekapasitashon. Awor sa sosodé tin biaha ku problema ta surgi pasó no a kai riba sierto kos, porehèmpel venenamentu durante embaraso. 'Esei por desaroyá mas agresivo aki. Na Hulanda por lo general ta resolvé e problema ei mas trempan. Mester kòrt'é den tòm.'

Skucha Tanja Fraai den un entrevista na hulandes ku Robert Verwey