Un programa kargá ta warda Reina Beatrix, prinsesa Máxima i prínsipe Willem-Alexander pa atendé kune durante nan bishita na Aruba i e anterior Antia ulandes, ku lo tuma lugá di 28 di òktober te ku 6 di novèmber.

Na Aruba, e promé isla kaminda e delegashon real lo akudí, lo bishitá un festival multikultural na Linear Park. Fuera di esei prens Willem-Alexander ta oradó invitá na konferensha di Green Aruba. Lo bai parke di naturalesa di Arikok i tambe Yuwana Morto, e distrito restorá. Último biá ku Lareina a bishitá Aruba tabata na 2006.

Paisnan nobo
Ta promé biá ku su mahestat ta hiba un bishita na paisnan nobo Kòrsou i Sint Maarten despues di desmantelashon di pais Antia ulandes fechá 10 di òktober di 2010, o sea aña pasá. Esaki ta promé biá tambe ku Lareina ta bishitá islanan Boneirue, Saba i Sint Eustatius komo munisipio ekstraordinario di Hulanda.

Boneiru ta e di dos isla riba skèdjel di gira di famia real. E delegashon lo bai parke kultural park Mangazina di Rei, i alabes área di naturalesa Lac Cai. Prensès Máxima lo hasi akto di apertura di edifisio di Youth and Family Foundation. Na Kòrsou, kaminda reina Beatrix, prensès Máxima i prens Willem-Alexander ta hospedá riba dianan 1 i 2 di novèmber, lo hiba un bishita na Prinses Margriet School, Academy Hotel, IFE o sea e instituto pa formashon di enfermero i tambe distritonan Seru Fortuna i Banda' Abou. Tambe e komitiva real lo presensiá un festival kultural riba Brionplein.

Desmantelashon Antia
Aña pasá mes Willem-Alexander i Máxima tabata presente na e seremonia na Kòrsou na okashon di desmantelashon di Antia ulandes. Lo bishitá pais nobo Sint Maarten for di 3 di novèmber, kaminda Mental Health Foundation, Emilio Wilson Park, Sundial School i festival kultural Clem Labega ta figurá riba programa.

Dia 4 di novèmber, bishita na munisipio ekstraordinario ulandes Sint Eustatius ta di skèdjel, unda ku lo habri fasilidatnan nobo di deporte. E delegashon real lo bishitá hardin botániko i Chapel Piece centre. Finalmente lo baha na Saba dia 5 di novèmber, kaminda un kas di grandi i un hòspital tin e onor di risibí Lareina i su komitiva. Haf, Cruyff Court i Saba University School of Medicine tambe ta riba programa.

Na Aruba, Sint Maarten i Kòrsou reina Beatrix, prinsesa Máxima i prínsipe Willem-Alexander lo tin un enkuentro ku gobernador,  minister-presidènt i ku Konseho di Minister. Djadumingu 6 di novèmber e delegashon ta bula bai Hulanda bèk.