Sint Maarten por lo pronto lo keda ku un solo kabel marítimo, ku ta konektá e isla ku e retnan internashonal di telekomunikashon. Motibu: e pèrmitnan nesesario pa konekshon for di laman no a keda otorgá na tempu.

Saba, Sint Eustatius i Sint Kitts sí a traha na tempu riba e preparashonnan i lo keda konektá den e promé siman di mart. Ponementu di e kabel marítimo ta un promé paso importante  pa mihó provishon di konekshon di Internet riba e islanan. Banda di esei e kabel marítimo ta nesesario pa ehekushon di e tareanan di gobièrnu hulandes na Saba i St. Eustatius.  

“Ta lamentabel ku Sint Maarten no a kooperá na tempu pa suminstrá e pèrmitnan”, di akuerdo ku Sybren van Dam, direktor Rijksdienst Caraibisch Nederland (RCN). “Nos ta purba den e simannan benidero pa haña klaridat tokante e pèrmitnan pa laga e kabel bini tera na Sint Maarten. For di yüni 2011 nos ta trahando riba esei.”

Konfiabilidat
Konekshon ku Sint Maarten ta esensial pa oumentá konfiabilidat di e provishonnan di Internet riba Islanan Ariba. Ku un konekshon ku Sint Maarten, Saba i Sint Eustatius ta haña e ora ei dos konekshon pa diferente isla. Tur e tráfiko di telekomunikashon di i pa Saba i Sint Eustatius por kaba di keda atendé via Sint Maarten i/o via Sint Kitts.

Tambe pa Sint Maarten instalashon di un di dos kabel marítimo ta trese bentaha, pasobra e aktual –  i úniko – konekshon riba e isla ta propiedat di grupo Telem of Companies i ku esei e tin e kòntròl tékniko i finansiero riba e asesibilidat  di e kabel marítimo di i pa Sint Maarten.   

Gastunan
"Si no haña klaridat e siman akí tokante e pèrmit, e ora ei Sint Maarten tin ku warda te den desèmber, despues di temporada di orkan, pa por keda konektá”, segun van Dam. “Esaki ta nifiká no solamente  posponementu pa habitantenan i empresanan na Sint Maarten, pero e ta trese kuné tambe un oumento konsiderabel èkstra di gastu.”

“Nos a averiguá si nos no por a trese e kabel tera for di Anguilla, Sint Barths òf e parti franses di Sint Maarten. Esaki no a resultá un opshon real, ya komo ku gobiernu hulandes mester di e kabel tambe pa ehersé su tareanan riba e parti hulandes di Sint Maarten. Nos lo sigui wak sigur si nos por kobra Sint Maarten e gastunan èkstra innesesario akí”, di akuerdo ku van Dam.