Personal di algun kompania di gobièrnu ta menasá di pone trabou abou. Di tur manera ta trata di Aqualectra, Curoil, Dòk, i refineria Isla. E sindikatonan STKO, SEU, STK, CBV, UGTK/CADMU, PWFC i ABVO na e momentunan aki ta reuní tokante esaki. Motibu ta seramentu di fabrika di Aqualectra na Mundu Nobo i e ponenshanan di Schotte tokante e kompania di awa i energia.

“Si awe nochi Kòrsou ta sin lus, awa i gasolin anto ta promé minister Schotte lo mester splika pueblo ta kiko ta pasando.” Segun Alcides Cova, presidente di sentral di sindikato SSK, e sindikatonan ta serio. “Kiko ku ta por sosodé. Esaki nos no ta aseptá mas.”

Otro prioridat
Ayera durante un konferensha di prensa tokante Aqualectra promé minister Schotte a anunsiá ku lo bai sera e fábrika na Mundu Nobo i ku na lugá di esaki lo bai invertí den energia solar. Lo basha e fabrika abou e aña aki mes. E trahadónan lo haña un training speshalisá i haña trabou otro kaminda. Ademas promé minister a bisa ku ta trata iresponsabelmente ku e kompania i ku trahadónan di Aqualectra ta dispidí plaka.

E tres sindikatonan di Aqualectra, SEU, STK, i STKO no ta di akuerdo ku e ponenshanan aki. Ta p’esei awe meinta a deliberá den ora di trabou. “Nos a hasi loke ta posibel pa sinta na mesa ku promé minister Schotte awe pero e ta bisa ku e tin otro prioridat”, segun Cova. “A papia kos ku no ta bèrdat i no a informá trahadónan di Aqualectra niun ora so. Awe por ta Aqualectra, mañan Isla. Ta p’esei mester hasi algu aworaki. Tur sindikato ta uní den esaki.”

Strategia
Aktualmente e sindikatonan ta deliberando ki paso mas tin ku tuma. Cova no por bisa si ta bini un wèlga general. “Awe tardi nos ta bai pensa un strategia. Mi no sa ainda kiko e ta enserá. Di tur manera m’a bisa mi yunan mira pa nan bai tènk kombustibela pa nan outo awor.”