“Nos ta haña mes tantu petishon pa fiansa pa outo ku den añanan anterior. I nos ta mantené kriterio igual ku antes pa honorá un petishon asina, òf no honor’é.” Esaki un kabesante ta bisa na fin di e promé dia di Show di Outo den e departamentu di fiansa provishonal ku Maduro & Curiel’s Bank NV a lanta e aña aki tambe den World Trade Center.

Te asina leu ku e funshonario por mira e limitashon di kredít ku Banko Sentral a poné riba bankonan di Kòrsou i Sint Maarten lo no toka e show di outo. E aña aki tambe e show lo generá rònt di 700 petishon di fiansa i lo aprobá sigur mitar di nan.

Seis luna largu bankonan no tin pèrmit di fia hende mas plaka ku e total na fiansa ku e bankonan tin ta kore fin di februari, ora Banko Sentral a sondea. Si un banko na e momentu ei tabatin 100 mion florin afó na fiansa, esaki ta e límite por lo pronto. Si na un dado momento 30 mion drenta na pago di fiansa e banko por bai bek te na e límité i asina por duna 30 mion na fiansa atrobe.

‘Barata’
E medida t’ei pa evitá ku plaka strañero ta sali bai. Kompra di outo di mes ta kousa ku plaka strañero ta sali. Pero no ta tur hende mester fia plaka pa por kumpra un outo. “Ta espesialmente e kumpradonan den e segmento mas barata di merkado ku mester di un fiansa”, asina Marley de Meza di iCars ta bisa. E ta bende entre otro Volkswagen i Mercedes Benz.

”Ke men outo di entre 19 mil pa 25 mil florin. Seka nos, preisnan ta kuminsá na 30 mil i por subi bai te 500 mil florin. Pero nos outo di mas karu na e show aki ta kosta 130 mil florin. Klientenan pa un outo asina ta paga tur luna for di nan salario òf segun un otro konstrukshon – ma nan no tin mester di un fiansa di banko.

‘Sin efekto’
Robert Moron di Universal Motors – su Kia Picanto ta kuminsá na 19.995 florin – ta ninga ku e kumpradó den e segmento barata di merkado ta eksperiensha un desbentaha di e límite di kredít. “Nos no a ripará niun diferensha den interes di públiko kompará ku añanan anterior. Kisas mas despues lo ripará algu di e limitashon di kredít, pero aktualmente esaki sigur no ta e kaso.”

Loke tampoko no ta diferente for di añanan anterior ta ku mayoria di e bishitantenan di e Show di Outo ta bini pa wak i no pa kumpra. Espesialmente e outo eléktriko a atraé hopi públiko, ounke ku e no tabata tei. “Hende ta bini djis pa sali keiru” Damaris ta konta. E ta keiru rònt i ta drenta sinta tras di di stürwil di algun outo ku e ‘sa mira riba kaminda i ku awo e ke sa kon ta pa sinta aden’.