Senador merikanu Edward Kennedy a fayesé. E tabata sufri di un tumor serebral. Ted Kennedy tabata e 'benjamin' di famia Kennedy, un di e famianan ku mas influensha polítiko den istoria di Merka. E tabata e ruman hòmber mas chikí di e presidente asesiná, John F. Kennedy i di minister di hustisia Robert F. Kennedy, ku tambe a bira víktima di un asesinato korto tempu despues.

For di 1962 Ted Kennedy a sinta sin interupshon den senado representando estado Massachusetts. Na 1980 el a kore kampaña pa bira presidente di Merka, pero un skandal di pasado a daña asuntu. Diesun aña promé el a kita ku outo for di un brùg kai den awa na isla Chappaquiddick. Un damita kolaboradó di kampaña ku tabata kompañ'é den outo a hoga ei. Ta te su manisé el a notifiká polis. Rumor tabata kore tambe ku e tabatin un relashon ku e dama.
 

Hopi hende ta konsiderá Ted Kennedy komo e delantero di un Merka progresivo. Echo ta ku e tabata fomentá kambio inovativo den enseñansa i salubridat públiko na Estados Unidos. E tabata un krítiko ferviente di e anterior presidente di Merka, George W. Bush. Durante e último kampaña pa elekshon presidensial e tabata un di e promé Demókratanan ku a ofresé su apoyo abiertamente na Barack Obama. El a deklará ku Obama ta brinda un generashon nobo di liderato ku Estadonan Uní di Merka tin nesesidat di dje.

Aña pasá a sali na kla ku Kennedy ta sufri di un tumor maligno den su selebro. Dia 21 di yanüari el a haña ataka durante e bankete di inougurashon di Barack Obama.For di aprel último e no a presentá mas den senado pa motibu di kebranto serio di salú. Ted Kennedy a bai sosegá na edat di 77 aña.