Mester kambia e malkontentu i krítika destruktivo ku ta reina na Kòrsou den produktividat i apresio mutuo. Mandatario i siudadano mester stòp di bringa otro, respetá e normanan probá di komunikashon entre hende i enrikesé nan mes ku sabiduria. Esaki presidente Gisette Seferina di Partido Nashonal di Pueblo (PNP) ta haña.

“Nos ta falta bon boluntat i kompetensha bou di mandatario pa enfrentá e desafionan ku nos pais ta topa ku éksito”, Seferina ta bisa. Segun e, un komunidat lo floresé numa te ora un “transportashon di idea’ tuma lugá optimalmente. “Komunikashon ta un forma di transportashon: trabou i komunidat lo bona si informashon útil sirkulá libramente den e pais.”

Piská ku funchi
Seferina no gusta mekanismo ku ta stroba desaroyo personal di hende. “Ya tin mitar siglo ku ta malkriá nos ku ayudo di desaroyo. Komo demokrat sosial kristian mi no ta simpatisadó di ‘duna kos gratis’. Por ehèmpel bo por yuda un hende sin trabou si bo dun’é chèns i motiv’é pa usa e chènsnan aki bon. E ora ei e mes lo sali bai piska e piská proverbial. Tanten ku bo keda dun’é piská hasá ku funchi, bo no ta promové ku e ta yuda su mes kurpa, i sigur nò ku e lo mira kon e mester tuma su mes responsabilidat.

E polítiko ta mira enseñansa komo e manera pa kombati pobresá i promové bienestar. “Mester trata di enseñansa di kalidat haltu ku un bon ‘transporte di sabiduria’. Si mucha na un edat hoben siña ingles pa medio di iPad i Nintendo mientras ku na skol nan ta skor abou den lès di ingles, enseñansa mester bira mes atraktivo ku e produktonan ku hobennan gusta.”

Strès
Seferina ta sinti falta di atenshon pa kuido mental den e diskushon di salubridat públiko. “Amtenar tin strès ekstremo pa motibu di e manera desagradabel ku nan propio gobièrnu ta trata nan algun aña kaba. Inklaridat ta kome nan konfiansa den nan mes, nan ta pèrdè nan trankilidat interno. E ora ei ta bira un tarea kasi inhumano pa laga e proyekto ku bo ta traha na dje bria i pa kab’é na un bon manera. Prome mester trata e salubridat mental na un bon manera.”

E presidente di PNP ta enfatisá ku ‘kuido médiko’ta enserá hopi mas ku lokashon di un hòspital òf preis di remedi. “Den e área aki mester skohe rashonalmente. Pero pa evitá mas tantu posibel ku un hende ta hañ’é ku remedi i hòspital, mester praktiká edukashon i prevenshon. Ki dia gobièrnu ta bai tuma tempu drechi un biaha pa pasa desishon di ehekushon di e asina yamá Warenlandsverordening di 1999? E ora ei pueblo mes ora lo haña komestibel mas salú.

Tambe Seferina ta puntra su mes kon largu Kòrsou mester warda ainda riba oumento di e asina yama práktika di medesina alternativo. Ku un pakete total, ku tin lugá pa remedi genériko tambe, mester por maneha kosto di kuido na un bon manera, e ta pensa.

Esaki ta e di dos artíkulo den un serie ku ta duna papabra na polítiko di tur partido tokante asuntu aktual urgente.