“Nos no tin reakshon ainda riba e deklarashonnan hasí den Tweede Kamer”. Asina relashonista di prensa Ramsay Soemanta a trese padilanti na nòmber di premier Gerrit Schotte. Promé ku esei, awe durante e konferensia di prensa semanal di premier na Den Haag, vise premier hulandes Maxime Verhagen (Asuntunan Ekonómiko, Agrikultura i Inovashon) a bisa ku nan gabinete no ta bai investigá e lèkmentu di informashon di Konseho di Minister di Reino.

Kontrario ku Tweede Kamer, Verhagen ta haña ku ta Kòrsou mes tin ku investigá e asuntu. Segun Soemanta, ainda ta muchu trempan pa reakshoná riba e petishon. “Ta mei ora pasá minister presidente Schotte a haña e notisia. El a kaba di haña sa. Pues di mes lo e no bisa nada mas al respekto promé ku fin di siman.”
Soemanta no sa si e promé minister lo bin ku un reakshon despues di fin di siman. “Lo tin ku konsultá ku tur minister promé.”

Asuntu di Hulanda
Segun Soemanta, e deklarashon di Verhagen no ta un ‘solisitut ofisial’ i komo tal ta un asuntu puramente di Hulanda. “Ta den Tweede Kamer so a papia ariba i ofisialmente nos no a tende nada ainda. Pues, na e altura akí ta Minister Donner ta esun mas indiká pa duna un reakshon.”

Preokupashon serio
Djaweps Tweede Kamer a pidi un investigashon di rijksrecherche òf AIVD pa saka afó ta ken a lèk e nótulonan di Konseho di Minister di Reino di djarason 5 di òktober. E nótulonan tabata un relato di minister plenipotensiario di Kòrsou, Sheldry Osepa na premier Schotte den kua ta bini padilanti ku gabinete hulandes tin preokupashon serio tokante e situashon polítiko na Kòrsou i ta evaluando un intervenshon.