Promé minister Gerrit Schotte djabièrnè lo no ta presente na e seremonia di apertura di Weganan Olímpiko na Londen. “Promé minister a disidí di no aktuá riba e invitashon di embahada britániko pasobra su agènda no ta pèrmití i tin otro prioridat”, segun su bosero Ramsey Soemanta. “Ademas lo tabata otro si e deportistanan por a bai Londen bou di nan propio bandera.”

Djamars 24 di yüli Schotte a risibí un invitashon di embahada britániko na Hulanda. Den un mail athuntu embahador britániko Paul Arkwright ta pidi despensa ku e invitashon a bini asina lat, segun deklarashon di Soemanta. E ta bisa ku Arkwright a duna komo motibu di e retraso ‘e proseso slo di desishon di Komité Internashonal Olímpiko (IOC) pa laga e atletanan kurasoleño tuma parti na e Weganan bou di bandera olímpiko’.

Bou di bandera propio ta mas interesante
Ayera Schotte i minister Monk di Enseñansa, Kultura i Deporte a deklará ku e atletanan kurasoleño lo bai partisipá na Weganan Olímpiko bou di bandera di Kòrsou. Segun Soemanta esaki ta basa riba ‘un mal entendementu i interpretashon desafortuná di media. ‘ “Nunka nos no a haña un konfirmashon ofishal di IOC ku e atletanan kurasoleño por partisipá bou di bandera di Kòrsou.Promé minister tambe sa esaki.”

Si IOC a laga karga bandera di Kòrsou na Londen durante di e desfile, e ora ei sí, segun Soematra, chèns lo tabata grandi ku Schotte lo a biaha pa Londen.

‘E invitashon ta di bèrdat’
Den media di Kòrsou mes ora despues di e anunsio tabata reina duda ku e karta ta bèrdat. Soemanta ta kita e duda aki. “Ayera nochi mes ora nos a kontaktá Kas di Kòrsou na Den Haag pa kontrolá un ke otro na embahada britániko i mi por garantisá shen porshento ku e invitashon ta di berdat.”