Promé minister Schotte te fin di e siman aki, ora reseso kaba, ta konta ku sosten temporario di FOL pa mantené mayoria pa su koalishon den Staten. Esaki e promé minister di Kòrsou a deklará djamars anochi 31 di yüli despues di un reunion ku, entre otro, gobernador.

Den un entrevista anterior Godett di FOL a laga sa ku a para e negoshasonnan temporariamente pasobra e partidonan di koalishon no por a garantisá ku nan tin sosten di dies asiento.

Wikènt pasá Gabinete Schotte a pèrdè su mayoria den Staten ku e retiro repentino di parlamentario Eugene Cleopa di partido di koalishon MAN. Ku sosten di FOL segun Schotte koalishon lo mantené mayoria den Staten sigur te fin di e siman aki. Kiko lo pasa despues ta dependé di Staten.

Falta di konfiansa
Schotte no ker a elaborá riba e retiro di sosten di koalishon di parlamentario i miembro di MFK Dean Rozier. “Nos a risibí e karta i a palabr é ku gobernador. Rozier tin un proposishon ku e ke papia di dje ku miembronan di partido MFK i nos ke warda esaki.”

Den su karta na presidente di partido MFK Amerigo Thodé, Rozier ta skibi ku ‘e no tin konfiansa mas den e koalishon aktual’. Na mes momentu e ta proponé pa apuntá un gabinete di eksperto pa asina MFK por retirá pa ‘pensa bon i prepará pa elekshon nobo’.

Si Rozier sali for di koalishon esaki por kosta koalishon un asiento mas i e ora ei sosten di FOL lo no ta sufisiente. Aktualmente ta parse manera ta FOL ta e úniko partido ku por wanta Schotte na mando. Kòmbersashon ku por ehèmpel e partido ku un asiento, PNP di Humphrey Davelaar, no tabatin niun resultado.

Oposishon ta traha plan
Mientras ku Schotte su koalishon ta lucha pa su eksistensha e kombersashonnan entre e miembronan di oposishon pa forma un koalishon nobo ta den ful suin. Asina lider di PAR i èks promé minister Emily de Jongh-Elhage ta konfirmá. “Tin palabrashon ta tumando lugá ku FOL, PNP i Cleopa. Pero ainda no tin un akuerdo di prinsipio niun ora so. Ta e posibilidatnan so nos ta palabrando”, segun Elhage.