Den e dianan akí Iglesia Katóliko hulandes ta prominentemente den notisia ku relato di kasonan di abuzu seksual na institutonan di pader i sùr. Wereldomroep i NRC Handelsblad a investigá e kasonan akí. Siman ku a pasa so kaba a notifiká mas ku 300 kaso. Algun reakshon anónimo ku Wereldomroep a risibí, a pidi atenshon pa posibel kaso di abuzu seksual na skol i internatnan di Iglesia Katóliko na Sürnam i na Antia i Aruba.

Djamars último a tene un konferensha di obispu pa trata e asuntu di abusu seksual, ku despues di Merka i Irlanda, a sali na kla na Hulanda tambe awor.

Un bon Katóliko
Sandra Frans-Michel di orígen antiano ta bibando basta ten na Almere. E ta sumamente aktivo den komunidat antiano i e ta un bon Katóliko, manera e mes ta bisa. Riba e pregunta kiko e ta sinti ku tur e notisianan di abusu seksual den seno di Iglesia Katóliko, e ta splika: "Komo un bon Katóliko, e ta hasíbu doló. Ora un ser humano kometé un eror grave asina, ta pasó e ta malu. Klaro, nos tur ta ser humano, nos tur ta yu di Dios, kreá den su semehansa, pero nos ta hende; nos tur tin piká i si nos tin duele di loke nos a hasi, nos por pidi pordon."

Frans-Michel ta konta ku den un di e servisionan di misa, pastor a atendé ku e asuntu. A bin dilanti ku mester di hopi orashon, tantu pa e agresornan komo e víktimanan.

Fe inkebrantabel
Tur e notisianan no a afektá fe di Frans-Michel. E ta konvensí ku no ta un kos ku a pasa den Iglesia Katóliko, ma serka hende, i e hendenan akí ta forma parti di Iglesia Katóliko. "Kosnan robes ku a pasa, sigur sigur ta nos tarea pa drecha nan. Mi fe ta fuerte den Señor; Iglesia Katóliko ta e vehíkulo ku mi ta usa pa mi yega na Dios, i Dios no a faya, hénde a faya, anto ku forsa di Dios nos ta sigui yuda pa hende faya ménos posibel!"