Gabinete hulandes ta wak regio di Karibe ku otro wowo i ta buska oportunidatnan ekonómiko pa tur parti di Reino. Den esaki e parti hulandes karibeño tin un ròl importante komo hup pa ekonomianan kresiente manera Brazil, Méhiko, Panama i Kolombia.

Asina tin skibí den un nota tokante maneho di eksterior di Reino den Karibe, ku minister Rosenthal a manda pa parlamentu djabièrnè 26 di ougùstùs.

Den e nota tin para kua ta e kosnan ku gobièrnu hulandes ta sinti su mes responsabel pe i e kosnan ku e ta mira komo su deber den regio di Karibe. I tambe e kosnan ku gobièrnu a skohé komo prioridat. Pa yega na un eskoho di e diferente tópikonan, gobièrnu a deliberá tambe ku e ministernan plenipotensiario di Aruba, Kòrsou i St. Maarten.

Bon bisiña
E maneho di Reino hulandes ta dirihí riba bon kontakto ku paisnan bisiña i – na unda por – riba reforsamentu di e lasonan di koperashon riba tereno di ekonómia, polítika, polítika i seguridat. Minister Uri Rosenthal den su nota: “Komo minister di Reino mi por habri porta pa nos kuater paisnan. I dor di e sinergia entre Hulanda, Aruba, Kòrsou u St. Maarten nos por subi nos komèrsio den direkshon di Sentro- i Latino-Amerika Di e manera aki nos por fortifiká Reino kompleto.”

Hulanda ta keda aktivo riba tereno di seguridat den regio. Asna Hulanda ta keda traha riba komabtimentu di aktividatnan ilegal manera kontrabanda di droga, trafikashon di hende i labamentu di plaka. Pa por hasi esaki Reino ta hasi palabrashonnan ku OAS, e organisashon di estadonan merikano.

Kambionan ambiental
E nota ta papia tambe tokante kambionan ambiental. Pa Rosenthal e konsekuenshanan di kambionan ambiental ta un menasa pa seguridat di pueblo karibeño. “Nan ta biba den un regio funerabel kaminda tin orkan ta pasa i kaminda nivel di laman ta subiendo. Riba e tereno aki Reino hulandes ta traha huntu ku un kantidat di organisashon i pais.”