Kòrsou mester di un taskforce permanente ku ta vigilá desaroyonan riba tereno finansiero internashonal. Asina e país lo por reakshoná na tempu riba kambionan importante. Esaki líder polítiko Alex Rosaria di Partido Adelanto i Inovashon Soshal (PAIS) ta bisa.

E ex-sekretario di estado (Finansas, PNP) ta ilustrá e balor di un taskforce asina na man di forsageo monetario riba merkado mundial. “Tin un guera di valuta andando entre potensianan manera China, Merka, Hapon i Union Europeo. China ta tene balor di su yuan abou di forma artifisial dor di kumpra masha hopi dòler merikano. E konsekuensia ta ku e balor di e valuta merikano ta subi mientras ku e balor di China su valuta mes ta baha”, Rosaria ta splika.

Influensia
Pero kon esaki tin influensia riba Kòrsou? Rosaria: “Paísnan grandi, organisá den G8 òf G20, no ta kontentu ku China su strategia. Tur hende ke ta relatívamente barata pa otro paísnan pa asina eksportá mas tantu posibel. Merka, por ehèmpel, ta tuma medida pa baha balor di su dòler pa no pèrdè bataya kontra China.”
Pasobra florin ta mará na dòler, e tambe ta baha den balor, Rosaria ta sigui bisa: “Esun ku tin debe na euro, ta sinti esaki mesora – bo mester di mas florin pa paga e mesun montante. Di otro banda e aserkamentu di China ta tarda e rekuperashon di ekonomia europeo. Un hende na Europa lo keda sin hasi biahe di fakansi leu e ora ei, pues nos turismo ta sufri bou di esaki.”

Interes
Rosaria ta indiká mas aleu ku ounke Kòrsou komo nashon chikitu no tin mesun posibilidat manera China pa yuda su mes valuta, tin kos ku e isla por hasi den esfera di interes. E punto ta ku mester tin e abilidat pa hasi adaptashonnan lihé ora potensianan grandi hasi esei.

Taskforce
“Un taskforce permanente por duna gobièrnu konseho na tempu pa evitá ku nos ta kore tras di e echonan. Un taskforce asina lo por konsistí di representantenan di ministerio di Finansa, ministerio di Desaroyo Ekonómiko, e Banko Sentral di Kòrsou i Sint Maarten i tambe di gremio empresarial”, Rosaria ta remarká. E no ta kere ku e idea akí lo wòrdu uzá pa hasi ainda mas nombramentu polítiko sino ku lo bai traha ku funshonarionan ku ya ta den servisio di gobièrnu pa kuida Kòrsou di posibel konsekuensha negativo di guera di valuta ku ta eksistí.

Alex Rosaria den kombersashon ku Sharlon Monart