Djamars anochi 2 di yüni mi a yam'é ainda for di Ginebra. Lo mi a bishit'é e wikènt akí na Amsterdam, asina nos a terminá nos kombersashon telefóniko. Pa basta tempu kaba nos no a wak otro, pasobra Ronny i su kasá Didi a pasa e lunanan di wenter na Kòrsou.

Ei nan a pasa mashá dushi mes i e mester a duna mi kumindamentu di diferente konosí mutuo. I nos tabatin asina tantu kos pa papia tokante dje: Obama, Sürnam, Kòrsou, e konflikto israelí-palestino i naturalmente e delaster desaroyonan den nos famianan.

Skèrpi skèrpi
E no tei mas, Ronny Rens, un hòmber ku un komentario skèrpi skèrpi, ku no ta bira lomba pa tópikonan fèrfelu. Tin be kosnan ku el a publiká tabata laga polítikonan i otro outoridatnan bira furioso. Un ten un presidente di parlamentu surinameño a puntra promé minister Van Agt ku e no por sòru pa stòp Zorg en Hoop; e no tabata gusta e tono krítiko.

Hopi Surnameño na Hulanda konosé Ronny pa su resúmennan di notisia den Zorg en Hoop. Na Sürnam mes e ta naturalmente konosí komo èks direktor dje emisora surnameño SRS, pa su trabou komo direktor dje sentro kultural 'Cultureel Centrum Suriname' (CCS), direktor dje emisora di televishon surnameño STVS i natural komo komentarista di mashá kompetishon di deporte i weganan di futbòl pa kampionato mundial.

E tabata sigui liganan merikano di beisbòl i básketbòl mashá di aserka i por a papia ku pashon tokante esaki. Ta e por a splikami por fin kon e reglanan di American Football ta funshoná i pakiko e hòmbernan ku hèlmu ta kore basha otro abou ku asina tantu violensha. Ora mi a komprondé e reglanan, mi tambe a kuminsá gusta e deporte.

Koresponsal
Mi a siña konosé Ronny Rens ora nos a atraé for di NOS komo koresponsal. Rònt di independensia di Sürnam i tambe añanan despues, el a bira nos trahadó ku semanalmente tabata duna resúmen di notisia pa e programa di radio ku despues a haña e nòmber Zorg en Hoop. E promé enkuentro berdadero a tuma lugá te mas despues, ora nos tabata traha basta luna ku otro kaba. Un enkuentro speshal, pasobra e tabata spera un periodista langolin, pero el a topa ku un hindustan delegá ku kabei largu.

Despues e enkuentro ei a pone nos hari basta be. Nos relashon a krese di ta kolega di otro i bira un amistat fasinante. Apesar dje diferensha di edat, e tabata reim binti aña mas bieu, nos a bira amigu íntimo, ku aparte di notisia por a papia oranan largu tokante deporte, polítika i nos famia. Nos no tabata uní solamente relashoná ku trabou, pero tambe pa e relashon ku nos tur dos tabatin ku Antia. Ronny a biba i traha ora e tabata mas hóben na Kòrsou i ami a lanta na Aruba.

Kòrsou
Hopi aña despues Kòrsou a bolbe uni nos. Na 1982 Ronny a bandoná Sürnam pa motibu di intimidashon kresiente i e esfera menasante na e pais. El a muda pa Kòrsou i a bira redaktor hefe dje korant Amigoe. Na 1985 ami a bira koresponsal pa ANP pa Karibe ku lugá di trabou Kòrsou.

Sürnam i e islanan antiano a bira pa nos tur dos pashon i e biá akí nos ta traha huntu atrobe, pero awor for di Willemstad. Na Kòrsou nos tabata bin huntu na kas di otro i mi yu hòmber mayó Roshan tabata gusta 'oom Ronny' mashá. E tabata ún dje hendenan ku denter di dies sekònde mucha ta sera amistat pa bida largu kuné.

E siman akí ora nos despedí di Ronny Rens lo mi hasi un reverensia profundo pa un periodista hopi talentoso i un patriótiko surinameño. Tabata un privilegio pa yam'é mi amigu.

Rajendre Khargi
 

Ronny Rens sr. tabata direktor di Stichting Radio Omroep Suriname (SRS) i a traha pa Surinaamse Televisie Stichting (STVS). Na 1980 despues dje gòlpi di estado el a traha komo relashonista públiko na Embahada Merikano na Paramaribo, pero a bandoná e trabou akí djis despues. Na Kòrsou Rens a kuminsá un bida nobo i a bira einan redaktor hefe di Amigoe. Delaster añanan Ronny Rens tabata biba na Amsterdam. Djaluna último promé di yüli el a selebrá su di 76 kumpleaños. Rens a fayesé den marduga di diabièrne 5 pa djasabra 6 di yüni, mas o ménos dos or, sintá dilanti televishon, na paramentu di kurason.

Kremashon di Ronny Rens ta djaweps 11 di yüni na santana De Nieuwe Ooster, Kruislaan 126 na Amsterdam.

Tin posiblidat pa tuma despedida di 14.00 te 15.00 or.

Servisio di entiero ta kuminsá 15.00 or i despues ta sigui kremashon.