'Si Tula por, nos tambe por', ta palabranan di Rinjo Martina, integrante di grupo di tambú 'Chill and untold'. Di e forma akí e ta motivá mucha yòn na un tayer na Bijlmerparktheater na Amsterdam Zuidoost. Fin di siman pasá algun hóben a partisipá na un tayer tokante Tula.

Djamars 17 di ougùstùs Amsterdam ta konmemorá e rebelion grandi di katibu, ku a tuma lugá na 1795 na Kòrsou. Tula tabata na kabes di e insurekshon ei 215 aña pasá. Joceline Clemencia, luchadó pa independensha lo tene un diskurso. Tambe lo deklamá poesia i ta bai tin un presentashon musikal djun banda hubenil di Bijlmer den Muiderkerk na Amsterdam.

Roël Calister, perkushonista di 'Izaline Calister Band' i Rinjo Martina di grupo di tambú 'Chill and Untold' a dirigí e workshop. Inspirá pa istoria di Tula, e hóbennan a komponé un rèp ku nan lo estrená mañan anochi, 17 di ougùstùs Dia di Tula, na Amsterdam.

Kaha
Oropo Nadal Uceda di 13 aña ta toka kaha, un instrumento ku sa usa pa Salsa i otro tipo di músika latino. Su mana ta antiano, su tata ta hulandes-spañó. Den bèkgrount di reportahe di Romeo Hoost por skucha zonido di su kaha.

Oropo Nadal Uceda a splika ku nan lo konmemorá Tula, ku a liberá  katibu i ku nan lo hasi esaki ku un 'remix' modèrnu, kaminda e lo toka kaha i kompañá rèper Arron Rosina i kantante Sueena Francisco. E hóben tineidjer a konta mas aleu ku ta fásil pa siña toka kaha. Loke e ta apresiá mas ta e echo ku e katibunan tabata tok'é i ku ainda e ta eksistí.