Brantwer ta bai avisá tur kas na Hulanda pa posibel peligernan di kandela den kas. Algemeen Dagblad ta bisa ku den algun aña tur kas mester a yega na turno. Durante di e kòntròl, brantwer lo paga tinu por ehèmpel na kombinashon di stèker mal usá of ousensia di aparato pa meldu huma.

Intrankilidat den mundu di enseñansa avansá, Trouw ta skibi. Tin preokupashon pa e oumento 'eksplosivo' di e kantidat di estudio. Den dies aña esaki a subi ku trinta porshento. Fundashon Limburgse Hogeschool Zuyd ta haña esaki un mal desaroyo pasobra asina lo no tin estudio úniko mas. Istitutonan di enseñansa avansá ta kopia riba otro, i asina ta bira mas difísil pa nan profilá nan mes i pa e studiante nobo por skohe.

E presidente di direktiva di e skol na Limburg kontra di su boluntat ta partisipá den e asina yamá 'ratrace'. "Estudio nobo ta atrahé studiante di otro instituto. Si bo mes no start e estudio, menos studiante lo drenta", e ta splika den Trouw. I menos studiante ke men menos plaka. Konseho di enseñansa avansá ta rekonosé e problema pero ta mira bentaha tambe di e sistema.

Algemeen Dagblad ta skibi ku tin behèit bou di komersiante, pòmp di gasolin i supermerkado pa motibu di un rekomendashon di Komishon Oropeo. Esaki ke pa klientenan den futuro por paga ku tur sen di papel di euro. Ke men biyete di 200 i 500 euro tambe. Komersio hulandes ta haña esaki ridíkulo.

"Si nos bai usa papel di dos of 500 euro, Hulanda ta bira un lugá mas peligroso, presidente Kok ta bisa. Tambe e organisashon di interes di pòmpnan di gasolin i e asosiashon di  supermerkado ta rechasá e proposishon. Segun minister De Jager di Finansa e rekomendashon oropeo no ta obligatorio.

Shafùr di trùk no ke tuma un tèst pa mira si nan tin apneu di soño pa evitá ku nan ta pega soño tras di stur. Den Algemeen Dagblad ekspertonan a proponé pa tene un tèst asina anualmente. Shafùr ku sobrepeso tin mas defekto di soño loke por hasi chèns riba un aksidente dòbel mas grandi. E shafùrnan di trùk mes ta sará ku nan tin reputashon di ta komedo di bolo gordo.
"Si, mi ta muchu gordo", un di nan ta bisa, "anto mi no tin gana di papia riba esaki." Un otro shafùr ta bisa ku ta masha fasil pa duna shafùr di trùk falta di tur kos ku ta bai malu den tráfiko, di aksidente te fila. E ta añadí: Un outomobilista gordo ta kore e mesun riesgo, awèl test e tur aña tambe anto.

De Telegraaf ta skibi ku ladron a drenta den kas di Nationale Onbudsman Alex Brenninkmeijer. Nan lo a horta dos aktentas ku diesdos fail konfidenshal. E ombudsman tabata na kas na momentu di e robo, djabièrnè pasá. Pa motibu di privacy no por bisa di kiko e dokumentonan hòrtá ta trata. Segun un bosero di ombudsman no tabata un robo ku un meta fiho. "Nan por a drenta seka bisiña tambe."

Un primisia di realesa den De Telegraaf: Prensès Amalia dia 19 di yüni lo sirbi kasamentu di e prinsesa heredero di Suesia, prensès Victoria ku Daniel Westling, doño di un gym. Asina fuentenan na korte di Den Haag i Suesia a konfirmá den deklarashon na e korant.