Staten di Aruba a aprobá e lei di enseñansa obligatorio unánimente. Despues di 11 aña di preparashon, e lei di enseñansa mandatorio ta drenta na vigor na ougùstùs di 2012. Algun parlamentario a vota pro e proyekto di lei, pero ku malagana sí. Nan ta duda di faktibilidat dje lei.

Den sektor di enseñansa tambe ta eksistí duda. Sindikato di dosente arubano (SIMAR) ta puntra su mes si gobièrnu ta disponé di sufisiente medio i personal pa kumpli efektivamente ku enseñansa obligatorio. Presidente Robin-Ann Didder ta bisa ku mester wak pa tur e instanshanan ta kla pa karg'é, tantu den komo pafó di enseñansa: "Dosente, guia di skol, Konseho di Tutela (antes: Voogdijraad), polis, tur hende mester karg'é." E ta duda si por alkansá tur esaki promé ku ougùstùs.

Skolnan ta kla?
Partido di oposishon MEP ta di akuerdo ku enseñansa mandatorio. Pero e kondishonnan esensial no tei ainda, segun Xiomara Ruiz Maduro, miembro di Staten di Aruba. Debí na eskases di dosente, ehekushon dje lei ta kore peliger, asina e ta kere.

Xiomara Ruiz Maduro (MEP, d) i Robin-Ann Didder di SIMAR

http://www.aworaki.nl

Marisol Lopez-Tromp tabata minister di enseñansa, aktualmente parlamentario independiente di Staten, ta un di esnan ku a traha riba e lei di enseñansa obligatorio. "E kos no ta pa pas'é sin mas den Staten. E pregunta ta si e skolnan ta kla pa implementá e lei pa e bira un éksito den práktika?" E ta haña ku riba esaki e no a risibí un splikashon sufisientemente kla.

Minister Arthur Dowers di Enseñansa sa di e prekupashon, ma e ta ripará tambe ku por atribuy'é p'un parti na falta di konosementu enkuanto lei di enseñansa obligatorio. Gran parti dje prekupashon ta dirigí riba kalidat di enseñansa, loke de echo no tin di nada di aber ku e lei di enseñansa obligatorio. "Ta kos ku mester duna atenshon n'é, tambe sin lei di enseñansa obligatorio, kos ku ta sosodiendo kaba."

Enseñansa pa tur hende
Ademas ta te aña eskolar nobo e lei ta bira vigente te si siguiente aña eskolar. "Tin un trayekto mas di implementashon promé ku ehekushon i mantenshon mes tuma lugá." T'asina ku lo instalá un ofisina di notifikashon pa enseñansa obligatorio i lo tene un kampaña di informashon pa mayor i partnernan den enseñansa riba embergadura dje lei.  

E meta ta pa finalmente tur mucha na Aruba haña enseñansa, asina Dowers ta bisa. "Investigashon a demostrá ku awóraki esei no ta e kaso." Implementashon di enseñansa obligatorio ta pertenesé n'e invershonnan den enseñansa, asina Dowers di. Ta p'e fin ei mes Aruba lo risibí plaka for di Oropa.