Mésora despues di konmemorashon riba De Dam e emisora di televishon AT5 a papia ayá ku e bishitantenan. Entre nan tabatin hopi mucha ku a spanta mashá ku loke a pasa. 'M'a tende un hende grita anto djei hende a kuminsá kai manera pieda di dominó. M'a kere ta algu meskos ku aña di Lareina aña pasá.' Asina Faissel di 11 aña ta bisa, e tabatá na e konmemorashon huntu ku 25 mucha di su klas.

Via nan wepsait e Komité Nashonal pa selebrashon di 4 i 5 di mei a laga sa di a spanta mashá. Pero e Komité ta kontentu tambe ku despues di e pániko e konmemorashon a sigui tòg. Pasobra asina kon ku bai bin por a konmemorá e víktimanan di guera.

Het Parool su vershon digital riba internèt a puntra e sikólogo sosial Roos Vonk pakiko e multitut riba De Dam a drenta pániko. 'Pániko ta kontagioso', e ta bisa, 'nos instinto ta bisa nos ku ora tin peliger mester kóre! Kore promé kaba wak ta kiko a pasa.' Segun Vonk pániko a kousa un kadena di reakshon ku mester a kuminsá seka di esun ku tabata pará banda di e hòmber ku despues nan a arestá. E persona aki a spanta, esun banda di dje a spanta mas tantu i e di tres a kuminsá kore, i asina e kos ta para bira un ola di pániko.

E úniko korantnan hulandes di papel ku a sali awe ta e korant gratuito Metro i Dagblad de Limburger. Metro ta yen di notisia di fiesta di liberashon. Na Amsterdam e kantante Giovanca lo presentá riba tarima. Tambe e komediante antiano Marlon Kicken i e rèper sürnameo Dio ta aktua n'e festival di liberashon.

Notisia di índole mundial:
Mayan Gran Bretania ta bai vota, pero kuater di kada dies votadó no sa ainda pa ken. Esaki a sali for di un sondeo di The Independent i e emisora di televishon ITV. Espesialmente pa Liberal Democrats e insiguridat aki por resultá fèrfelu. Komo 41 porshento di e hendenan ku ta bisa ku nan lo vota pa nan, alabes ta bisa ku nan ta kontemplá otro opshon tambe. Segun e sondeo mayan e Konservativonan mayan lo haña mayoria di voto, esta 37 porshento.

Atrobe Reina Fabiola, e èks reina di Bélgika a haña menasa di morto. Asina e korant franses di Bélgika La Dernière Heure ta skibi. E korant a risibí un karta di menasa na persona di e reina. E outor di e karta ta menasá ku e lo asesiná e "hèks spañó" manera e ta yam'é antó, dia 21 di yüli. Esaki ta e dia di fiesta nashonal di Bélgika i aña pasá tambe a menasá su mahestat belga Fabiola ku morto promé ku e fiesta. Segun e korant e karta parse esun di aña pasá mashá.

Esun ku drumi menos ku seis ora p'anochi lo muri mas trempan. Asina investigadónan ingles i italiano a establesé i BBC ta reportá. Di e grupo di hende ku durante di un temporada di 25 aña a drumi menos ku seis ora pa anochi, 12 porshento mas a muri ku esnan ku a drumi seis pa ocho ora. Drumi di mas tampoko no ta bon; hende ku drumi mas ku nuebe ora pa dia tambe ta muri mas tempran ku e promedio.