Tin ku tene famianan ku ta riba mal kaminda miho na bista. Esaki un mayoria di parlamento ta bai bisa minister Hirsch Ballin awe durante un debate di emergensha. Trahadonan sosial mester aktua mas lihé i adekuá ora premirá problema den famia. De Telegraaf ta skibi. "Si a mete mas tempran den problema di famia por a evita morto", miembro di parlamento pa CDA, De Pater ta opiná. Motibu ta asesinato di dos mucha na Zierikzee, wikènt pasá.

E káos rondó di elekshon di konseho munisipal na Rotterdam ta asina grandi ku tin ku konta votonan di nobo. Asina eks -alkaldenan Ivo Opstelten i Bram Peper ta bisa den Algemeen Dagblad. Mas fayo a sali na kla: 2500 habitante di munisipio Hillegersberg -Schiebroek a risibi kada, dos karchi pa vota. Despues di a deskubrí esaki a manda karchi di vota nobo pa e habitantenan. Pero ahinda por a vota ku e karchinan bieu.

Tabata konosi kaba ku ta'tin algun kos ku no ta klòp, tambe den e hòki di vota. Entre otro a kambia algun trahado na urna riba dia di votashon. Ivo Opstelten ta konsehá alkalde Aboutaleb, den Algemeen Dagblad, pa konta e votonan di nobo, lo mas pronto posibel. 'Ta trata konfiansa di e votado durante e proseso di votashon'. Eks alkalde Bram Peper ta di akuerdo ku Opstelten: 'Durante elekshon tin ku kita tur posibilidat ku por trese duda'.

E skandal moral den iglesia katóliko ta birando mas grandi. Awor ta trata tambe e órden di hende muhe, De Telegraaf ta skibi ku e prome notifikashonnan di maltrato dor di sùrnan a drenta. Un hòmber ta konta den e korant ku for di su 11 aña dos sùr a viol'é na Tegelen. No solamente mucha hòmber pero tambe mucha muhe ta viktima di e ' diabelnan di kompashon'.

Prins Bernhard tabata kambia e bèrdat pa asina su nòmber no keda manchá. Esaki ta pará den Trouw. Motibu ta publikashon di e buki ku historiadó Annejet van der Zijl a skibi tokante e prinsipe. E lista ku kosnan ku no ta kompletamente bèrdat durante su hubentut na Alemania ta largu. E kos di mas remarkabel ku Van der Zijl a deskubrí ta e karchi di miembresia ku ta proba ku Bernhard tabata miembro di NSDAP, un partido nazi. Henter su bida largu el a desmentí esaki."No ta straño pasombra e prins a gaña tambe tokante rikesa di su mama", por sigui lesa den Trouw.

Hulandesnan ta keda duna sèn na instansianan di bon kousa. No opstante kritiká riba ayudo di desaroyo i krisis ekonómiko. Profesor di filantropia, Theo Schuyt, ta bisa den Nederlands Dagblad. E ta kere ku e siglo akí ta bira un siglo di oro pa loke ta trata filantropia.

Personanan riba 60 aña a logra spar un bon montante di sèn i no tin ku laga esaki atras pa nan yunan. E yunan por yuda nan mes. "Nan ta laga nan sèn pa instansianan di bon kousa". Pero e instansianan aki tambe ta kambia. Naturalmente ta keda duna sèn na instansianan manera Unicef i Krus Korá. Pero dor ku gobièrnu lo tin menos fondo pa enseñansa, salubridat, i kultura, lo bai duna sèn na e instansianan aki tambe. Theo Schyut ta sigui bisa den Nederlands Dagblad.