De Telegraaf ta skibi ku korte oropeo a duna pasaheronan aéreo, ku retraso di buelo, rason. Pasaheronan ku tabatin mas ku tres ora retraso tin derecho riba kompensashon ku por subi te 600 euro. Kompanianan di aviashon manera KLM ta teme kleimnan di daño masha haltu. Mayan minister Eurlings di Tráfiko ta papia ku Tweede Kamer riba e asuntu akí. Hendrik Noorderhaven di fundashon EU-Claim, ku pa años ta lucha pa kompensashon di pasahero ku buelo retrasá, a reakshoná sumamente kontentu den De Telegraaf.

Un di kada dies notifikashon di kaso di maltrato di mucha ta falsu. E informe akí nos por lesa den Trouw. E lugánan di konseho i notifikashon di maltrato di mucha ta haña anualmente reim 16.000 notifikashon. Di e kantidat aki tin basta kaso ku ta inhustu. Despues di un notifikashon ta sigui un investigashon na skol, krèsh i dòkter di kas. E investigashon akí ta pone preshon riba e famia konserní. Un mama ta bisa den e artíkulo: 'Hopi hende ta pensa: kaminda tin huma tin kandela.' Tin un pregunta ku ta sòru pa hopi strès, asina e mama ta bisa den Trouw. E pregunta ta: ken a duna e notifikashon falsu? Den mayoria kaso e fuente ta keda deskonosí.

Denter di sinku aña plaka kèsh ta disparsé. Tur kaminda lo mester paga ku kódigo personal òf pa medio di selular. Fundashon di konsumidó ta spera esaki. E informe aki nos por lesa den Algemeen Dagblad. Entrante aprel kompania di telekomunikashon Telfort ta e promé kompania ku ta kuminsá ninga kèsh. Lo por paga solamente ku pin, esta kódigo personal. Fundashon pa Konsumidó ta spera ku pakus i tiendanan lo sigui lihé. E manera di paga akí ta mas sigur i fásil.

Algemeen Dagblad ta dediká atenshon na e programa di televishon nobo 'Enkele Reis Paradijs'. Den e programa shèfkòk di televishon Herman den Blijker ta bai ku nuebe kandidato Kòrsou. Ganadó dje programa di kushinamentu lo bira shèfkòk dje Klup na Papagayo Beach Resort na Kòrsou. Ofisina di turismo di Kòrsou ta invertí den e programa pa promové turismo na Kòrsou. Segun Algemeen Dagblad, e ofisina di relashon públiko ku ta atendé interesnan di Kòrsou no ke bisa kuantu ofisina di turismo ta paga pa promoshon dje isla.

Den Metro nos ta lesa informashon dje kantidat di biahe pa Vancouver pa Weganan Olímpiko di Wenter. E kantidat ta muchu ménos ku a spera. Ta kalkulá ku 4000 Hulandes lo sinta riba e tribunanan olímpiko. E organisashon di biahe ATP, bendedó ofishal dje karchinan, a konta ku 7000 fanátiko. E tiki interes pa karchi tin di aber ku e krísis ekonómiko, segun e organisasdhon di biahe. Canada no ta pegá ku Hulanda. Fuera di esei e pais ta gigantesko; e region oksidental kaminda Vancouver ta situá, ta bast'un pida distansha. Gastunan di un teket ta entre 3000 i 4000 euro. E karchinan di entrada pa kompetensha di skats sí a bai manera pan kayente.