Den futuro mester trata hende deprimí mayor di edat ku shòk di koriente. E impakto eléktriko ta kousa un atake epiléptiko i asina ta kombatí depreshon. Segun e Asosiashon ulandes di Sikiatria esaki ta duna efekto mas lihé kompará ku remedi antidepresivo. Ademas, e remedinan ta lanta síntomanan sekundario seka hende mayo di edat, asina tin pará den Nederlands Dagblad. Dòkternan no ke usa terapia di shòk ainda pa hubentut. Mester komprobá promé si ta seif.

Tin problema ku karchi di transporte públiko di Kruidvat, un kadena di drugstore. Te aña pasá por a biaha rònt Hulanda sin límite pa 12 euro. Pero e kompanianan di transporte Arriva, Syntus i Connexxion no ke aseptá e karchi pa motibu di un konflikto ku esun di trèin, esta Nederlandse Spoorwegen.

E kompanianan komersial ta keha ku NS no ta traha areglo pa akshonnan di rebaho, asina ta ku nan a fada. Parlamentario Eski, miembro di CDA ta pidi minister demishonario Eurlings di Tráfiko pa splika e asuntu akí. Den deklarashon pa De Telegraaf el a bisa ku e kos aki no por. "Kompetí ku otro ta bon, pero e klientela no mester bira víktima di dje."

Awe 8 di mart ta dia internashonal di hende muhé. Diferente korant ta duna atenshon n'esaki, por ehèmpel den un relato tokante e festival Women Inc. ku a tuma lugá ayera na Amsterdam. Trouw ta skibi dje spich di komisario di Lareina na Zeeland i alabes èks minister Karla Peijs. E ta haña ku movementunan di hende muhé ta prekupá muchu ku muhénan prominente so. Peijs no tin duele di e muhénan aki. Di tur manera nan lo logra den bida. Pero tòg ta nán ta risibí mil bé mas atenshon di movementu pa hende muhé. "Hasi algu pa e masa, e muhénan den posishon abou i di ménos perspektiva. Wak si nan tin e oportunidat di krese i desaroyá den nan karera," asina Karla Peijs a bisa Trouw.

Si bo ta strañero i bo kore outo muchu duru na Hulanda, Ministerio Públiko no ta kastigábo. Ku eksepshon di strañero di Bèlgika, Alemania i Suisa. Ku otro pais Hulanda no tin un sistema di interkambiá informashon di number di outo i asina no por but e outomobilista, asina Algemeen Dagblad  ta reportá. Sinku aña kaba miembronan di Union Oropeo ta supos di por interkambiá informashon, ma esaki no ta sosodiendo hopi ainda.

De Pers ta skibi di Microsoft. Fanátikonan ku ta odia e kompania di software a atmití aña pasá ku Bing, e mashin di buska informashon, no ta dje malu ei afteròl. Komentarionan riba Windows 7 tambe tabata positivo. Segun revista Fortune esaki ta debí n'un aktitut nobo, esta di humildat. Microsoft ta pinta su mes komo únderdog', asina De Pers ta skibi.

Thalys, e trein di velosidat haltu ta hasi mas boroto riba e trayekto nobo HSL di loke a kalkulá anteriormente. Motibu ta e manera ku a pega reil na beton. E pantayanan pa dèmpel zonido tambe no a sali dje bon ei manera antes. Esaki a sali den un investigashon di TNO, i ta pará den De Telegraaf. For di zomer tabatin keho di boroto, e ora ei a tira falta riba trèinnan di Intercity. Ma ta Thalys mes ta hasi bochincha.

Trouw ta e promé un ku a mira e promé vershon di e programa elektoral ChristenUnie. E korant ta skibi ku e partidoke ekonomisá 12 miar di euro for di e periodo binidero di gabinete binidero. Esaki mester ta inisio di mehorashon dje situashon finansiero di gobièrnu ulandes. ChristenUnie ta pensando riba un belásten di krisis spesialmente pa hende riku.